Nanyumbu Yang’ara Mbio za Mwenge wa Uhuru 2025

Posted on: May 17th, 2025

Na, Lunanilo Ngela

Kiongozi wa Mbio za Mwenge wa Uhuru Kitaifa kwa mwaka 2025, Ndg. Ismail Ali Ussi, ameipongeza Wilaya ya Nanyumbu kwa kutekeleza miradi bora ya maendeleo inayozingatia falsafa ya Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan, ya kuwahudumia wananchi.

Pongezi hizo zilitolewa Mei 17, 2025, wakati Mwenge wa Uhuru ulipokimbizwa katika Wilaya ya Nanyumbu na kutembelea jumla ya miradi sita yenye thamani ya Shilingi Bilioni 1.27. Kati ya miradi hiyo, minne iliwekewa mawe ya msingi, huku miwili ikionwa na kukaguliwa na Mwenge wa Uhuru.

Akizungumza katika hafla ya uwekaji wa jiwe la msingi katika ujenzi wa madarasa mawili na ofisi ya walimu katika Shule ya Msingi Nachiura, Ndg. Ussi alisema:

"Ni maelekezo ya Mheshimiwa Rais kwamba Halmashauri na Manispaa zetu zitenge fedha za mapato ya ndani kwa ajili ya utekelezaji wa miradi ya maendeleo. Naipongeza Halmashauri ya Nanyumbu kwa kutekeleza maelekezo haya kwa vitendo."

Miradi mingine iliyowekewa mawe ya msingi ni pamoja na ujenzi wa miundombinu ya maji katika Kijiji cha Michiga, ujenzi wa zahanati katika Kijiji cha Namaguluvi, na ujenzi wa barabara ya Jarome pamoja na uendelezaji wa barabara ya Msangi kwa kiwango cha lami zenye urefu wa kilomita moja.

Vilevile, Mwenge wa Uhuru ulitembelea na kukagua shughuli za utunzaji wa mazingira katika shamba la miti la mfano lililoko Kijiji cha Chinyanyila pamoja na shughuli za kikundi cha madereva bodaboda cha Umoja ni Nguvu kilichopo Kijiji cha Mtokora.

Awali, Mkuu wa Mkoa wa Mtwara, Mhe. Kanali Patrick Sawala, alimkabidhi Mwenge wa Uhuru Kaimu Mkuu wa Wilaya ya Nanyumbu, Mhe. Abdallah Mwaipaya, baada ya kuwasili Mkoani humo ukitokea Mkoa wa Ruvuma. Katika Wilaya ya Nanyumbu, Mwenge huo umekimbizwa umbali wa kilomita 143.

Kaulimbiu ya Mbio za Mwenge wa Uhuru kwa mwaka 2025 ni:

“Jitokeze Kushiriki Uchaguzi Mkuu wa Mwaka 2025 kwa Amani na Utulivu.”