Nanyumbu yafanya vizuri Miradi ya Mwenge 2019

Posted on: September 29th, 2019

Mkuu wa Wilaya ya Nanyumbu Mhe. Moses J. Machali akiwa na Mwenge wa Uhuru katika viwanja vya Stendi ya mabasi Mangaka

Na, Lunanilo L. Ngela

Kiongozi wa Mbio za Mwenge wa Uhuru kitaifa kwa Mwaka 2019 Ndg. Mzee Mkongea Ali ameipongeza Wilaya ya Nanyumbu kwa kufanya vizuri katika miradi yake yote ya Mwenge kwa mwaka 2019.

Akitoa pongezi hizo katika viwanja vya Stendi ya mabasi Mangaka, Kiongozi huyo wa Mbio za Mwenge wa Uhuru amesema kuwa Wilaya ya Nanyumbu imefanya vizuri katika Miradi yake na hivyo miradi yote saba yenye Thamani ya Shilingi 1,071,151,980/= kuzinduliwa.

Ukiwa wilayani Nanyumbu, Mwenge wa Uhuru umefungua mradi mmoja, kukagua miradi miwili pamoja na kuzindua miradi minne. Miradi hiyo ni pamoja na Ujenzi wa Soko la kijiji cha Nakopi, Ujenzi wa nyumba na Ofisi ya Afisa Tarafa Nakopi, Ujenzi wa kituo cha mafuta RAK Oil Michiga, Upandaji wa miti Mara, Ujenzi wa madarasa Shule ya Msingi Muungano, Kukagua banda la TAKUKURU, Uchaguzi, Afya na vikundi vya wajasiliamali.

Mwenge wa Uhuru umepokelewa mapema leo ya Tarehe 29/09/2019 katika Kijiji cha Lumesule wilayani Nanyumbu ukitokea Tunduru na kukimbizwa umbali wa Kilomita 132 katika Tarafa 3 kati ya 4, Kata 10 kati ya 17 na Vijiji 24 kati ya 93.

Mkuu wa Wilaya ya Nanyumbu Mhe. Moses J. Machale ametoa pongezi za dhati kwa Rais wa Jamhuri ya Muungano wa Tanzania Dr, John Pombe Magufuli kwa kuipatia Nanyumbu fedha za miradi ya maendeleo. Aidha, Mkuu huyo wa Wilaya ameahidi kuendelea kushikamana bega kwa bega na watendaji wengine wa Wilaya katika kutimiza kiu ya Rais Magufuli ya kuwapatia maendeleo wananchi na hasa wanyonge.

Kauli mbiu ya Mwenge wa Uhuru kwa Mwaka 2019 "MAJI NI HAKI YA KILA MTU, TUTUNZE VYANZO VYAKE NA TUKUMBUKE KUSHIRIKI UCHAGUZI WA SERIKALI ZA MITAA"