Nanyumbu Yaadhimisha Siku ya Usafishaji Duniani kwa Kufanya Usafi Mangaka

Posted on: September 20th, 2025

Mkuu wa Wilaya ya Nanyumbu (mwenye kofia katikati) akizungumza na wananchi waliohudhuria zoezi la usafi

Na; Lunanilo Ngela

Mkuu wa Wilaya ya Nanyumbu, Mheshimiwa Christopher Edward Magala, amewataka wananchi wa wilaya hiyo kuhakikisha wanatunza mazingira kwa kufanya usafi katika makazi yao, ili miji na vijiji vya Nanyumbu viwe safi na vyenye kuvutia.

Akizungumza Septemba 20, 2025 wakati wa maadhimisho ya Siku ya Usafishaji Duniani (World Clean-up Day) yaliyofanyika kwa kufanya usafi katika mji wa Mangaka, Mhe. Magala amewakumbusha watumishi wa umma na wananchi kushiriki kikamilifu katika shughuli za usafi na utunzaji wa mazingira.

Maadhimisho hayo nchini Tanzania huratibiwa na Wizara ya Afya kwa kushirikiana na Ofisi ya Rais – TAMISEMI, ambapo taasisi za umma, binafsi na jamii huungana na nchi zaidi ya 190 duniani kushiriki katika kutunza mazingira na kudhibiti taka kwa usahihi.

Kaulimbiu ya mwaka 2025 ni “Tunza Mazingira kwa Kuzipa Taka Thamani”, ikilenga kuhamasisha jamii na wadau kushiriki katika urejelezaji (recycling) na matumizi mbadala ya taka (re-use), ili kupunguza athari zinazotokana na taka zisizodhibitiwa.