Nanyumbu kutekeleza Mradi mkubwa wa mazingira unaofadhiliwa na Benki kuu ya Dunia

Posted on: July 10th, 2020

Katika picha ni Mkuu wa Wilaya Nanyumbu Mhe. Moses J. Machali akiwa katika ukumbi wa mikutano wa Halmashauri Nanyumbu

Na, Lunanilo L.Ngela

Nanyumbu ni miongoni mwa Halmashauri 86 nchini Tanzania zinazotekeleza Mradi wa Usafi na Mazingira katika Vituo vya kutolea huduma za Afya na Kaya. Mradi huu unafadhiliwa na Benki kuu ya Dunia na utatekelezwa kwa miaka sita (2019-2025).

Akizungumza katika kikao cha Kamati ya Afya Msingi Wilaya kilichofanyika katika ukumbi wa Halmashauri Mhe. Moses J. Machali, amesema kuwa Mradi huo wa Lipa kwa Matokeo (PfoR) unalenga kuboresha usafi na mazingira katika jamii na hivyo kuwataka wajumbe wa Kamati kuhakikisha wanatekeleza vizuri mradi huo ili kuleta matokeo chanya.

Afisa Afya wa Wilaya Ndg. Iliasa S. Matandiko amesema kuwa Wilaya ya Nanyumbu imepokea Shilingi 272,830,523.79 kwa ajili ya mradi huo. Aidha, utekelezaji utafanyika kwa vituo 10 vya kutolea Huduma za Afya kwa kujenga vyoo bora vya wagonjwa na watumishi, kuweka mifumo ya maji ya bomba, kuweka sehemu za kunawia mikono maeneo yote mhimu na kuweka bafu wodi za wazazi

Ili kufanikiwa kwa mradi huo wa usafi na mazingira, wananchi wote wanahamasishwa kutumia vyoo bora. Vigezo vya vyoo bora ni lazima kiwe cha kisasa au cha shimo chenye sakafu au ekolojia, choo chenye kuta na mlango kinachosafishika.

Wajumbe wa Kikao hicho wametoa shukrani zao za pekee kwa wafadhili wa mradi huo na wameahidi kuutekeleza vizuri na kwa wakati ili kuboresha miundombinu ya usafi na mazingira.