Naibu Waziri Mifugo na Uvuvi aahidi neema shamba la mifugo Nangaramo

Posted on: March 31st, 2023

Katika picha ni Naibu Waziri wa Mifugo na Uvuvi Mhe. David Silinde (Mb) akizungumza na Mkuu wa Wilaya ya Nanyumbu Mhe. Mariamu Chaurembo (kushoto) alipotembelea shamba la mifugo Nangaramo

Na, Lunanilo Ngela

Naibu Waziri wa Mifugo na Uvuvi Mhe. David Silinde (Mb) ametembelea shamba la mifugo Nangaramo wilayani Nayumbu Machi 31, 2023 na kuzungumza na wananchi waliojitokeza shambani hapo kumpokea ikiwa ni pamoja na kutembelea mabanda ya mifugo na kupokea taarifa ya uendeshaji wa shamba hilo.

Akizungumza mara baada ya kutembelea mabanda ya mifugo shambani hapo, Mhe. Silinde amesema kuwa, Wizara inafanya jitihada kubwa ya kuboresha mifugo na kufanya uzalishaji uwe bora zaidi na wenye tija ili kuinua kipato cha wafugaji.

Naibu Waziri huyo ameongeza kuwa, nia ya Rais wa Jamhuri ya Muungano wa Tanzania Mhe. Dr. Samia Suluhu Hassan ni kufufua na kubadilisha maisha ya watanzania kupitia mifugo na uvuvi jambo ambalo Wizara hiyo imejipanga kutekeleza kwa vitendo.

Aidha, Mhe. Silinde ameahidi kufanyia kazi changamoto mbalimbali za shamba hilo ikiwemo upatikanaji wa maji, uhaba wa watumishi wa sekta ya mifugo wilayani Nanyumbu, uhaba wa miundombinu ya kunyweshea na kuogeshea mifugo pamoja na kutimiza ahadi zote zilizoahidiwa na viongozi wa Wizara hiyo katika kuboresha na kuongeza uzalishaji katika shamba.

Naye Mkuu wa Wilaya ya Nanyumbu Mhe. Mariam Khatibu Chaurembo akizungumzia changamoto katika Sekta ya Mifugo wilayani hapo amesema kuwa, Wilaya ina maafisa mifugo watatu tuu na hivyo kuiomba Wizara kuongeza watumishi ili kuharakisha maendeleo  wilayani hapo. Aidha, Mhe. Chaurembo ameongeza kuwa pamoja na Wilaya kufanya jitihada kubwa ya kupima na kutenga vitalu 100 vya wafugaji lakini bado kuna uhaba mkubwa wa miundombinu ya maji na majosho.

Kaimu Meneja wa Shamba Ndg. Wilbard S. Deograsias amesema kuwa, shamba la mifugo la Nangaramo lina ukubwa wa ekari 5,633.7 na lilianzisha mwaka 1970 kwa lengo la kuzalisha na kusambaza mitamba chotara ya ng’ombe wa maziwa kwa mikoa ya Lindi, Mtwara na Ruvuma.  Aidha, meneja huyo amemweleza Naibu Waziri kuwa shamba lina uwezo wa kubeba ng’ombe 2,700 ingawa kwa sasa lina ng’ombe 402 na hivyo kuiomba Wizara kuongeza mifugo hususani ng’ombe dume.