Mkuu wa Mkoa wa Mtwara aagiza walioiba fedha ya wakulima Nanyumbu kukamatwa

Posted on: April 10th, 2018

Mkuu wa Mkoa wa Mtwara Mh. Gelasius Gasper Byakanwa ameipokea taarifa ya Tume ya uchunguzi iliyoteuliwa kwenda kujiridhisha kama wakulima wote wa Wilaya ya Nanyumbu wamelipwa fedha ya Korosho katika msimu wa kilimo 2017/2018. Tume ilikuwa na wajumbe watano ambao walitoka Ofisi tofauti ikiwemo Ofisi ya Mkuu wa Wilaya, TAKUKURU, POLISI na Ofisi ya Mkurugenzi Mtendaji. Mwenyekiti wa Tume Ndg, Severine Msonda akisoma taarifa ya Tume mbele ya Mkuu wa Mkoa amesema kuwa Wilaya ya Nanyumbu ina vyama 37 na vyote vimepitiwa na tume. Aidha, vyama vya msingi hivyo vilikusanya kilo 20,205,121 za korosho kwenye matawi na  kupeleka maghala makuu (ware house) kilo 19,757,495 na kulipwa Shilingi 72,986,102,050/=. Tume imebaini kuwa jumla ya kilo 225,296 za wakulima hazijalipwa mpaka sasa huku vyama vikiwa havina hela jambo lililosababishwa na ubadhilifu wa baadhi ya viongozi wa vyama vya msingi ikiwa ni pamoja na uzembe. Aidha, Timu imetoa takwimu ya vyama vyote vilivyopoteza korosho, wahusika pamoja na kiasi cha fedha kinachotakiwa kurudishwa ili wakulima walipwe pesa zao.

Mkuu wa Mkoa amelaani vikali wizi uliofanywa na baadha ya viongozi wa vyama vya msingi  ikiwepo chama cha Napacho ambako yalifanyika malipo hewa ya Tshs Milioni 209,000,910/= ambazo waliingiziwa watu wasiouza hata punje ya kurosho. Mkuu wa Mkoa ameviagiza Vyombo vya vya Ulinzi na Usalama kuwakamata wale wote walioingiziwa malipo kwa kuuza korosho hewa, pamoja na wote ambao kwa namna moja au nyingine wametajwa na Tume kuwa wamefanya wizi/ubadhilifu.

Mkuu wa Wilaya ya Nanyumbu Mh. Selemani Mzee amesema kuwa Kamati ya Ulinzi na Usalama inaanza leo kupokea malamiko ya wakulima kuhusiana na korosho katika ukumbi wa Halmashauri ikiwa ni pamoja na kuwakamata watu wote waliohusika katika wizi huo. Wananchi wa Wilaya ya Nanyumbu wametowa shukrani zao za pekee kwa Mkuu wa Mkoa na Uongozi wa Wilaya kwa kuingilia kati mgogoro huu. Aidha, wameiomba Serikali kuendelea kuwa karibu na wakulima ikiwa ni pamoja na kuzileta pembejeo kwa wakati ili kufanikisha uzalishaji wa korosho katika msimu wa kilimo 2018/2019.