Mbunge Nanyumbu aongoza harambee kuchangia Ujenzi wa shule

Posted on: December 20th, 2018

Mbunge wa Jimbo la Nanyumbu Mhe. Dua Willium Nkurua (Kulia) akizungumza na wananchi katika harambee na kushoto ni Kaimu Mkurugenzi Mtendaji wa Halmashauri Ndg. Emmanuel Kapinga

Na, Lunanilo L. Ngela

Mbunge wa Jimbo la Nanyumbu Mhe. Dua Willium Nkurua ameongoza wananchi katika harambee ya kuchangia ujenzi wa miundombinu ya Shule ya Sekondari Masuguru ili kuiwezesha shule hiyo kupokea wanafunzi wa kidato cha kwanza mapema 2019. Harambee hiyo imehudhuliwa na viongozi mbalimbali wa Wilaya ya Nanyumbu pamoja na wananchi wa Kata ya Masuguru.

Mheshimiwa Mbunge amewahamasisha wananchi na wadau mbalimbali katika kushiriki kikamilifu katika ujenzi wa miundombinu ya shule hiyo ili kuhakikisha shule inakamilisha majengo yote mhimu na kuiwezesha kusajiliwa na Wizara ya Elimu. Katika Kata ya Masuguru wanafunzi husafiri zaidi ya Kilomita arobain (40) kwenda shule ya sekondari Nanyumbu ili kupata Elimu hali inayopelekea wanafunzi wengi kutohitimu kidato cha nne.

Katika Harambee hiyo, jumla ya mifuko 161 ya simenti (taslimu na ahadi) imechangwa ikiwa ni pamoja na ahadi ya shilingi 3,761,900/=  pamoja na fedha taslimu kiasi cha shilingi 731,400/=  ili kuwezesha ujenzi huo. Aidha, wananchi wameahidi kuendelea kushirikiana na Serikali ili kuhakikisha shule ya Sekondari Masuguru pamoja na Maratani zinakamilika na kuwawezesha wanafunzi kusoma kwa utulivu. 

Diwani wa kata ya Masuguru  Mhe. Benjamini Masimbo akizungumza kwa niaba ya wananchi wa kata hiyo, ameiomba Serikali kukubali shule hiyo ya Masuguru kufunguliwa mapema mwakani ili kuwawezesha wanafunzi kusoma hapo huku wakiondokana na tatizo la kusafiri zaidi ya kilomita arobaini Mpaka kata ya Nanyumbu kufuata shule.

Wananchi wa Kata ya Masuguru wakizungumza na Ofisi ya Habari wametoa pongezi za dhati kwa Mbunge wa Jimbo la Nanyumbu Mhe. Dua W. Nkurua kwa namna anavyoshirikiana nao katika kuharakisha maendeleo ya Wilaya ya Nanyumbu. Mheshimiwa Dua (Mb) wiki mbili zilizopita alijenga hoja mbele ya Waziri wa Afya, Maendeleo ya Jamii, Jinsia, Wazee na Watoto ya kuomba kupewa mashine ya Mionzi kwa ajili ya Hospitali ya Mangaka, hoja iliyozaa matunda na Hospitali kupewa mashine mpya ya kisasa ya Mionzi yenye thamani ya zaidi ya shilingi milioni 200.