Mbio za Mwenge wa Uhuru zakamilika rasmi wilayani Nanyumbu

Posted on: June 12th, 2018

Mkurugenzi Mtendaji wa Halmashauri ya Wilaya ya Nanyumbu Ndg. Hamis H. Dambaya (kushoto) akimkabidhi mwenge wa Uhuru Mkurugenzi wa Halmashauri ya Mji Masasi Bi Gimbana Ntavyo mapema leo katika Halmashauri ya Mji wa Masasi baada ya kukamilika kwa mbio za Mwenge wa Uhuru wilayani Nanyumbu. Mkurugenzi huyo wa Nanyumbu akiwahutubia maelfu ya wananchi na viongozi waliofurika kwa ajili ya kuupokea Mwenge wa Uhuru, ametoa shukrani za pekee kwa kiongozi wa Mbio za Mwenge kitaifa ndugu Charles Francis Kabeho na kusema kuwa akiwa katika wilaya ya Nanyumbu kiongozi huyo amefanya kazi kubwa ya kuhakikisha kuwa fedha za Umma zinatumika vizuri.

Mwenge wa Uhuru ukiwa Wilayani Nanyumbu umekimbizwa umbali wa Km.186.8 zilizo ndani ya Tarafa tatu kati ya nne za Wilaya ya Nanyumbu ambazo ni Nakopi, Mangaka na Maratani.

Mwenge wa Uhuru katika Wilaya ya Nanyumbu umepitia miradi Kumi na moja (11)  yenye thamani ya shilingi 1,449,089,543/= kutoka vyanzo vinne ambavyo ni:- (i) michango ya wananchi Shilingi 47,810,170 sawa na asilimia tatu, (ii) Halmashauri ya Wilaya shilingi 394,350,273/= sawa na asilimia ishirini na saba, (iii) Serikali Kuu Shilingi 209,129,100/= sawa na asilimia kumi na nne (iv) Wahisani shilingi 797,800,000/= sawa na asilimia hamsini na sita. Aidha, katika miradi hii Mwenge wa Uhuru umefungua miradi miwili, umeweka jiwe la msingi mradi mmoja, umekaguwa miradi minne na kuzinduwa miradi mitatu.

Kiongozi wa  mbio za Mwenge Kitaifa akiwaaga viongozi na wananchi wa Wilaya ya Nanyumbu ameipongeza Wilaya ya Nanyumbu kwa mapokezi mazuri ya Mwenge pamoja na ukarimu wao mkubwa waliouonyesha kwa wakimbiza Mwenge. Aidha, ameipongeza Wilaya ya Nanyumbu kwa kuwa na miradi bora yenye tija kwa wananchi. Kiongozi wa mbio za Mwenge pia amepongeza mahusiano mazuri yaliyopo kati ya Ofisi ya Mkuu wa Wilaya na Mkurugenzi Mtendaji yaliyopelekea Wilaya ya Nanyumbu kupiga hatua nzuri ya Kimaendeleo.

Wananchi wa Wilaya ya Nanyumbu wametoa pongezi zao za dhati kwa Rais wa Jamhuri ya Muungano wa Tanzania Mh. Dr John Pombe Magufuli na kumshukuru kwa kuhakikisha bei ya korosho inakuwa nzuri. Aidha, wananchi wametoa shukrani zao za dhati kwa kupata bahati ya kutembelewa na Mwenge wa Uhuru. Wananchi wa Wilaya ya Nanyumbu walijaa barabarani na katika maeneo yote ambako Mwenge wa Uhuru umefika ili kuupokea.

Ujumbe wa Mwenge wa Uhuru kwa mwaka 2018 ni "ELIMU NI UFUNGUO WA MAISHA; WEKEZA SASA KWA MAENDELEO YA TAIFA".