Makundi ya wafugaji yaliyoingia Nanyumbu bila vibali yapewa siku 5 kuondoka

Posted on: September 9th, 2023

Mkuu wa Wilaya ya Nanyumbu Mhe. Mariam Khatibu Chaurembo akizungumza na wananchi wa Kijiji cha Lumesule

Na, Lunanilo Ngela

Wafugaji waliovamia mashamba ya wakulima Wilaya Nanyumbu wakitokea maeneo mbalimbali wamepewa siku tano kuanzia Septemba 9, 2023 mpaka Septemba 13, 2023 (Jumatano) kuhakikisha wanaondoka katika maeneo hayo.

Maelekeo hayo yametolewa mapema Septemba 9, 2023 na Mkuu wa Wilaya ya Nanyumbu Mhe. Mariam Chaurembo wakati akitatua kero za wananchi wa kijiji cha Lumesule ambao wamelalamikia kuharibiwa mazao yao na wafugaji hao

Wakizungumza mbele ya Mkuu wa Wilaya wanakijiji wamemweleza kuwa, wafugaji hao huchunga mifugo yao kwenye mashamba ya wakulima na pindi wanapojaribu kuwazuia huambulia kipigo ikiwa ni pamoja na kuharibiwa mali zao

Akizungumza katika Mkutano huo, Mkuu wa Wilaya amewaeleza wananchi hao namna Ofisi yake inavyolishughulikia swala hilo kwa ukaribu na kuwasihi wananchi hao kutojichukulia sheria mkononi

Aidha, Mhe. Chaurembo amesema kuwa ofisi yake inatarajia kukutana na Mkuu wa Wilaya ya Tunduru ambako baadhi ya wafugaji hao hutoka huko na kuvuka mipaka ya Wilaya yao kufuata malisho ya mifugo  Nanyumbu na baadae kurudi kwao

Naye Afisa Kilimo na Mifugo wa Wilaya ya Nanyumbu Ndg. mashaka Mfaume amemweleza Mkuu wa Wilaya kuwa, hakuna kibali chochote kilichotolewa na Halmashauri ya Wilaya ya Nanyumbu cha kupokea wafugaji katika eneo linalolalamikiwa na wananchi hao wa Lumesule na hivyo kuiomba serikali kuwaondoa wafugaji hao ili kurejesha utulivu wa vijiji hivyo

Mkuu wa Jeshi la Polisi Wilaya ya Nanyumbu  Afande Severine Msonda akizungumza na wananchi wa Lumesule amewaeleza umuhimu wa kufuata sheria wakati wa kutatua migogoro ikiwa ni pamoja na kuwaonya wananchi hao kutojichukulia sheria mkononi