Mafunzo ya Udereva Nanyumbu kuanza rasmi

Posted on: July 24th, 2018

Katibu Tawala wa Wilaya ya Nanyumbu Ndugu Salum A. Palango (Katikati) akiwa katika picha ya pamoja na Maafisa wa Usalama barabarani pamoja na Mshauri wa Jeshi la akiba.

"Future World Vocationi" ni Taasisi inayoendesha mafunzo ya udereva ikishirikiana na Jeshi la POLISI kitengo cha Usalama Barabarani. Lengo la Taasisi hii ni kuwapatia mafunzo madereva wa magari na pikipiki katika miji na vijiji ili kuondoa kabisa ajali za Barabarani. Mratibu wa Mafunzo hayo Ndugu David Haruna Mkenza amesema kuwa Taasisi hiyo itaendesha mafunzo ya udereva kwa wiki mbili katika Wilaya ya Nanyumbu kuanzia Tarehe 27/07/2018 siku ya Ijumaa. Lengo kuu la mafunzo haya ni kuwajengea uwezo wa kutosha madereva ili kufanikisha suala la usalama barabarani. Ndugu David Mkenzi amesema mafunzo haya yataanza saa 10.00 jioni hadi saa 12:00 Jioni ili kuwapa nafasi watu mbalimbali wakiwemo watumishi wa umma kushiriki. Aidha, ameongeza kwa kusema kuwa mafunzo haya yataendeshwa katika Mji wa Mangaka na katika kata mbalimbali za Wilaya ya Nanyumbu.

Katibu Tawala wa Wilaya ya Nanyumbu Ndugu Salumu A. Palango amepongeza juhudi kubwa zinazofanywa na Jeshi la POLISI katika Wilaya ya Nanyumbu katika kuhakikisha ajali zinatokomezwa kabisa. Aidha, amesisitiza kuwa wale wote wanaomiliki vyombo vya moto na hawajapata mafunzo ya udereva wahakikishe wanahudhuria mafunzo ya udereva ili kuepukana na ajali barabarani. Katibu Tawala akizungumza katika kikao hicho Ofisini kwake amesema kuwa mafunzo haya yatawasaidia wanachi mbalimbali na hasa wamiliki wa pikipiki (bodaboda) ambao bado hawajapata mafunzo ya udereva na wangependa kuendesha vyombo hivyo vya usafiri.

Mkuu wa Kitendo cha Usalama Barabarani Wilaya ya Nanyumbu Afande Nicodemas (DTO) amesema kuwa ni lazima madereva kutumia taaluma yao ya udereva vizuri ili kuepusha ajali barabarani. Aidha, amesisitiza kuwa mafunzo haya ni mhimu sana kwa wale wote wanaomiliki vyombo vya moto barabarani ili kuwajengea uwezo wa kuendesha kwa usalama. Nae Mratibu wa Mafunzo ya Usalama Barabarani Afande Mwambe amesema wananchi waitumie fursa hii kupata elimu ya udereva inayowafuata mpaka vijijini ili kuhakikisha ajali zinakoma kabisa. Wananchi mbalimbali wakizungumza na Afisa Habari wa Wilaya ya Nanyumbu Ndugu Lunanilo L. Ngela wamekipongeza sana kitengo cha Usalama Barabarani kwa kusimamia na kuratibu  mafunzo haya mara kwa mara kwa madereva ambayo yamesaidia sana kupunguza ajali za barabarani. Aidha, wameiomba Taasisi ya Future kuleta mafunzo hayo mara kwa mara kwana idadi kubwa ya watu wananunua vyombo vya usafiri na hasa pikipiki.