Maazimisho ya Kilele cha wiki ya Wazazi Nanyumbu yafanyika Mangaka Sekondari

Posted on: April 5th, 2018

.Mada mbalimbali zatolewa

.Shule ya Msingi Chikotwa ina mwalimu mmoja na wanakijiji hawataki walimu

.Utoro wa wanafunzi uliokithiri waidhoofisha Idara ya Elimu Sekondari

.Baraza la wazazi Nanyumbu latoka na maazimio ya moto

Maazimisho ya Wiki ya Wazazi kiwilaya yamefanyika leo Tarehe 05/04/2018 katika Shule ya Sekondari Mangaka huku wazazi wakitoka na maazimio mbalimbali ya kuinua taaluma ikiwa ni pamoja na kusimamia maadili. Mwenyekiti wa Jumuia ya Wazazi Mkoa wa Mtwara Ndg, Hussein Kasuguru ambaye pia alikuwa Mgeni Rasmi wa kilele hicho amewataka wazazi kusimamia maadili na kuhakikisha ufaulu wa wanafunzi unaongezeka ili kupata vijana bora wenye tija kwa Taifa. Ndg, Juma Muruwa ambae pia ni mjumbe wa Baraza kuu la wazazi Taifa ameipongeza Wilaya ya Nanyumbu kwa kuwa na ushirikiano mzuri baina ya watendaji wa Serikali na kufanya Ilani kutekelezeka

Katibu wa Wazazi Mkoa wa Mtwara Ndg, Mohamed Omari akizungumzia suala la mporomoko wa maadili amesema Jumuia ya Wazazi ina wajibu wa kusimamia malezi ya vijana na watoto. Aidha, amezitaja sababu mbalimbali za kuporomoka kwa maadili kuwa ni pamoja na Jamii kuacha mila na desturi, kutelekezwa kwa watoto na kuvunjika kwa ndoa. Katibu wa Wazazi Mkoa wa Mtwara ameitupia jicho Idara ya Elimu na kusema katika kuinua Elimu ni mhimu sasa wazazi wakifungua ukurasa mpya wa mahusiano mazuri na walimu ili kujua maendeleo ya watoto shuleni, kuhakikisha watoto hawapewi simu za mkononi wakiwa shule na kwamba ajenda ya malezi iwe ya kudumu. Ndg, Mohamed Omari amewakumbusha Maafisa Elimu kuhakikisha walimu wanafundisha mada zinazoendana na mihutasari ikiwa ni pamoja na kusimamia maadili ya walimu.

Kaimu Afisa Elimu Msingi Ndg, Noeli Chola aliliomba Baraza la Wazazi kufanya kazi kwa karibu na Idara ya Elimu kwani kuna baadhi ya vijiji wazazi hawatoi ushirikiano. Akitolea mfano wa Shule ya Msingi Chikotwa katika kata ya Nanyumbu ina mwalimu mmoja kwa mda mrefu na kila Idara inapotaka kupeleka walimu wanakijiji wamekuwa wakiweka vikwazo. Kaimu Afisa Elimu Sekondari Ndg Seifu Zuberi amesema kuwa suala la Mdondoko wa wanafunzi katika shule za Sekondari wilayani Nanyumbu limekithiri na kufanya  wanafunzi wachache sana kuhitimu Elimu ya Sekondari. Angela Aore ambaye ni Afisa Maendeleo ya jamii amewataka wazazi kuwa wajasiliamali huku Asia Mkini Afisa ustawi wa jamii akikemea unyanyasaji wa watoto. Kitengo cha Utamaduni kikiwakilishwa na Zainabu Mgeni kimewataka watu kutetea utamaduni wa Taifa letu ikiwa ni pamoja na kuitaka jamii kuanzisha vikundi vya ngoma.

Katibu wa Wazazi wa Wilaya ya Nanyumbu Bi. Fatma Mshihiri pamoja na M/Kiti Wazazi wa Wilaya ya Nanyumbu wamewaagiza wazazi katika kila eneo kuhakikisha wanatekeleza maazimo yaliyofikiwa katika Baraza, aidha wamesema kuwa Jumuiya ya wazazi Wilaya haitasita kuchukua hatua mara moja kwa wale wote ambao hawatatekeleza majukumu yao. Kauli mbiu ya mwaka huu ilikuwa ni       "Sisi wazazi tupo imara kusimamia malezi na maadili ya watoto wetu".