Maajabu ya Pango la Habiba kuvuta watalii Nanyumbu

Posted on: October 16th, 2018

Katika picha hiyo ni barabara inayoingia wilayani Nanyumbu kutoka Mkoa wa Ruvuma

Na, Lunanilo L. Ngela

Nanyumbu ni miongoni mwa Wilaya chache sana nchini Tanzania zenye maeneo adimu ya kihistoria pamoja na vivutio vya kipekee vya utalii. Wilaya hii iliyopo mkoani Mtwara  ipo Kilomita 54 kutoka Masasi katika barabara ya Mtwara - Songea. Aidha, inapakana na Wilaya ya Nachingwea kwa upande wa Kaskazini, Wilaya ya Masasi kwa upande wa Mashariki, Jamhuri ya watu wa Msumbiji kwa upande wa kusini na Wilaya ya Tunduru kwa upande wa Magharibi.

Pango la Habiba ni miongoni mwa vivutio vya kihistoria vilivyovuta hisia za watu wengi ndani na nje ya Wilaya ya Nanyumbu. Pango hili  lipo ndani ya Hifadhi ya Wanyamapori ya Lukwika Lumesule. Ili kulitembelea pango hili ni vizuri ukifahamu baadhi ya Mambo ya kihistoria. Ikumbukwe kuwa Hifadhi hii ya wanyamapori (Lukwika Lumesule game reserve) inapakana na Kata ya Lumesule ambako ndiko lilikopiganwa pigano la mwisho la vita vya majimaji. Zipo baadhi ya kumbukumbu katika Mlima Makong'ondera ikiwepo mifupa ya kale pamoja na mafuvu katika mapango yanayosadikiwa kuwa huenda ni wapiganaji wa vita vya majimaji vilivyoongozwa na Kinjekitile Ngwale (1905-1907)

Hifadhi ya Lukwika Lumesule hutenganishwa na Mto Ruvuma ambao hugawa hifadhi hii upande wa Tanzania na Msumbiji. Serikali ya Tanzania kupitia mapato yake ya ndani ikishirikiana na Jamhuri ya watu wa Msumbiji ilifanikiwa kujenga Daraja la kisasa la Umoja huko Mtambaswala ambalo ni kivutio kikubwa cha Utalii katika Wilaya ya Nanyumbu. Ofisi ya Habari Nanyumbu wakati ikienda kulitembelea pango la Habiba  ilipata bahati ya kufika daraja la Mtambaswala na kupokelewa na Ndg. Salum Lihame Mwamba (Afisa mahusiano) na kubahatika kukutana na simulizi za Mtambaswala.

Salum Lihame Mwamba ambaye ni mtunza kumbukumbu za historia ya daraja la Umoja Mtambaswala anasimulia namna wajerumani walivyofika Mtambaswala wakati wa vita kuu ya kwanza ya Dunia (1914-1918) na namna vita ilivyopiganwa wakati wajerumani wakitafuta njia ya kuvuka kwenda Msumbiji wakitokea Tanganyika. Ukifika Mtambaswala utaoneshwa maeneo hayo ya kivita, lakini pia utafanikiwa kuifahamu vizuri historia ya Utumwa na namna soko la Mkunazini Zanzibar lilivyofungwa na baadhi ya raia walioachwa huru walivyofika Mtambaswala. Ukiwa Mtambaswala utafanikiwa pia Kuliona Daraja linalotembea pamoja na kuiona mbuga nzuri ya Lukwika Lumesule ambayo ndio Hifadhi pekee ambayo tembo mkubwa kuliko wote Afrika Mashariki na kati alipatikana humo.

Safari ya Kuelekea pango la Habiba huwafurahisha wengi kwani ukiwa njiani utapita kijiji cha Nakopi kwenye Mlima Majeja ambao juu yake kuna tumbaku ya ajabu na mtu yeyote anaruhusiwa kuvuta akiwa kule mlimani kwa masharti ya kutoondoka nayo kwani ukiondoka nayo lazima utapotea. Mlima huu hufanana sana na ule wa Chitowe ambao una pipa lisilofikika na pipa hili lilikuwepo tangu kipindi cha Ukoloni wa kijerumani.

Miongoni mwa vivutio vilivyopo Nanyumbu ni pamoja na Chemchem ya maji moto  katika Mto Ruvuma kitongoji cha Nangale kijiji cha Lukula. Maji haya ni ya moto yenye uwezo wa kuivisha hata mahindi. Aidha, ipo ardhi inayotikisika katika kijiji cha Namatumbusi. Pango la Habiba hili ni pango maarufu sana katika Hifadhi ya wanyamapori ya Lukwika Lumesule. Pango hili pamoja na mwonekano wake wa kipekee lakini pia huwa msaada mkubwa kwa binadamu na wanyama pindi wapatapo matatizo. Yupo Mwanamke aliyefahamika kwa jina la Habiba alipata msaada wa pango hilo wakati akiwakimbia watu waovu na akatoka salama mikononi mwao. Hii ndio asili ya Jina Pango la Habiba.

Tukutane Nanyumbu, Kumenoga