Kutoka Darasani Hadi Gereji: Binti Mdogo Naishero Sekondari Anayesoma na Kufanya Kazi ya Uchomeleaji

Posted on: July 3rd, 2025

Katika picha ni Shazimita Mohamed Adam akiwa katika moja ya karakana mjini Mangaka

Na; Lunanilo Ngela

Katika mji wa Mangaka, Wilaya ya Nanyumbu, msichana mdogo mwenye umri wa miaka 17 ameibua mshangao na kuvutia hisia za wengi baada ya kuonekana akifanya kazi ya uchomeleaji (welding), kazi ambayo kwa kawaida hufanywa na wanaume pekee.

Huyu si mwingine bali Shazimita Mohamed Adam, mwanafunzi wa Kidato cha Tatu katika Shule ya Sekondari ya Naishero. Alianza kujifunza fani hiyo mwezi Novemba 2022, mara baada ya kumaliza darasa la saba, kwa nia ya kujipatia ujuzi utakaomsaidia kujiajiri na kujitegemea katika maisha yake ya baadaye.

"Niliamua kuchagua uchomeleaji kwa sababu siyo kazi inayofanywa na wasichana wengi. Nilijua itanipa nafasi ya kipekee katika soko la ajira na kunijengea heshima," anasema Shazimita kwa kujiamini, macho yake yaking’aa kwa matumaini.

Licha ya kuwa bado shuleni, Shazimita hutumia siku za Jumamosi na Jumapili kwenda kwenye karakana moja mjini Mangaka karibu na mgahawa wa mabatini kujifunza kwa vitendo. Anaifanya kazi hiyo kwa moyo wote, huku ndoto yake kubwa ikiwa ni kumiliki karakana ya kisasa na kutoa ajira kwa vijana wenzake.

Shazimita anaamini kuwa elimu ya ufundi ni mkombozi wa kiuchumi kwa vijana, na anaunga mkono wito wa Waziri Mkuu wa Jamhuri ya Muungano wa Tanzania, Mhe. Kassim Majaliwa, aliyewahimiza vijana kujiunga na vyuo vya ufundi kama VETA ili kujenga taifa lenye watu wenye ujuzi na uwezo wa kujitegemea.

"Ningependa shule za msingi na sekondari zianze kufundisha masomo ya ufundi. Tukianza mapema, tutajenga jamii yenye ujuzi na isiyopenda utegemezi," anasisitiza Shazimita.

Kwa mujibu wa Ripoti ya Benki ya Dunia (2021), zaidi ya asilimia 60 ya vijana barani Afrika hukumbwa na changamoto ya ajira rasmi. Mataifa kama Ujerumani tayari yamepunguza tatizo hilo kupitia mfumo wa elimu ya ufundi wa vitendo (Dual Vocational Training System), ambapo zaidi ya nusu ya wanafunzi hujiunga na mafunzo hayo kuanzia ngazi ya chini.