FUM Nanyumbu Yavunja Rekodi ya Mapato na Kuandika Historia Mpya ya Miradi

Posted on: June 18th, 2025

Na, Lunanilo Ngela

Mwenyekiti wa Kamati ya Fedha, Uongozi na Mipango (FUM) wa Halmashauri ya Wilaya ya Nanyumbu, Mhe. Benjamin Raphael Masimbo, amewapongeza wajumbe wa kamati hiyo kwa kusimamia ipasavyo ukusanyaji wa mapato na matumizi bora ya rasilimali za Halmashauri, akisema watakumbukwa daima kwa uzalendo na bidii yao ya kazi.

Akizungumza katika kikao cha mwisho cha kamati hiyo kilichofanyika Juni 18, 2025, katika ukumbi wa Halmashauri, Mhe. Masimbo alieleza kuwa wakati Kamati hiyo inaanza kazi mwaka wa fedha 2020/2021, Halmashauri ilikuwa inakusanya mapato ya ndani ya shilingi bilioni 2.1. Hata hivyo, kutokana na usimamizi madhubuti wa kamati hiyo, “makusanyo hayo yameongezeka hadi kufikia shilingi bilioni 4.2 katika mwaka wa fedha 2024/2025.”

Miongoni mwa mikakati iliyochangia mafanikio hayo ni pamoja na kudhibiti ununuzi holela wa mazao kama korosho, ufuta na mbaazi nje ya mfumo wa stakabadhi ghalani; kuanzisha na kuimarisha vizuizi vya kudhibiti utoroshwaji wa mazao; kubuni vyanzo vipya vya mapato; na kufanya ufuatiliaji wa karibu wa vyanzo vilivyopo ili kuhakikisha vinafanya kazi kwa ufanisi.

Katika kipindi hicho cha miaka mitano, miradi ya maendeleo yenye thamani ya shilingi bilioni 4.6 imetekelezwa Idara ya Elimu Msingi kwa kutumia mapato ya ndani ya Halmashauri, ruzuku kutoka Serikali Kuu, pamoja na michango ya wafadhili na wananchi. Miradi hiyo imejumuisha ujenzi wa vyumba 88 vya madarasa, ofisi 52 za walimu, nyumba 10 za walimu, na matundu 252 ya vyoo na madawati 1,320 yametengenezwa. Aidha, shule mbili mpya za msingi Kilimanihewa B na Napalavi zimejengwa.

Kwa upande wa elimu ya sekondari, miradi yenye thamani ya shilingi bilioni 7.4 imetekelezwa, ikiwa ni pamoja na ujenzi wa shule mpya nne za sekondari (Mkapa, Naishero, Rukumbi na Kilimanihewa), ujenzi wa vyumba 108 vya madarasa, majengo manne ya utawala, ofisi 32 za walimu, nyumba 12 za walimu, matundu 128 ya vyoo, maabara 13, bwalo moja la chakula, mabweni 21, hosteli 2, vyumba vinne vya TEHAMA, maktaba 4. Vilevile, viti 2,711 na meza 2,805 zimetengenezwa.

Aidha, kwa upande wa sekta ya afya, miundombinu ya huduma za afya yenye thamani ya shilingi bilioni 2.6 imetekelezwa. Miradi hiyo inajumuisha ujenzi wa jengo la dharura (EMD), jengo la mionzi, jengo la huduma kwa wagonjwa wa nje (OPD), maabara, bohari ya dawa na vifaa tiba, pamoja na ukarabati wa miundombinu ya Hospitali ya Wilaya ya Mangaka. Vilevile, vituo viwili vya afya vya Mnanje na Mikangaula vimejengwa, sambamba na ujenzi wa zahanati mpya 14

Kwa upande wake, Mkurugenzi Mtendaji wa Halmashauri hiyo, Ndg. Ibrahim John Mwanauta, ameipongeza Kamati hiyo kwa uadilifu, uwajibikaji na uzalendo wao katika kusimamia mapato na utekelezaji wa miradi. "Wajumbe wa Kamati hii wamekuwa mfano wa kuigwa. Mchango wao utabaki kuwa sehemu ya historia ya mafanikio ya Nanyumbu," alisema Ndg. Mwanauta.