DC Magala: “Wananchi Tujitokeze kwa Wingi Kupiga Kura Oktoba 29”

Posted on: October 13th, 2025

Na, Lunanilo Ngela

Mkuu wa Wilaya ya Nanyumbu, Mheshimiwa Christopher Edward Magala, amewataka wananchi wa wilaya hiyo kujitokeza kwa wingi kushiriki katika zoezi la kupiga kura ifikapo Oktoba 29, 2025, ili kutumia haki yao ya kikatiba kumchagua Rais wa Jamhuri ya Muungano wa Tanzania, Wabunge na Madiwani. 

Akizungumza Oktoba 13, 2025,katika kikao kazi kilichowakutanisha wenyeviti na watendaji wa vijiji, watendaji wa kata pamoja na maafisa tarafa, kilichofanyika katika ukumbi wa Shule ya Sekondari ya Wasichana Mkapa, Mheshimiwa Magala alisisitiza umuhimu wa ushiriki wa wananchi katika uchaguzi,sambamba na kulinda amani na utulivu katika kipindi chote cha kuelekea uchaguzi mkuu.

Amesema kuwa viongozi wa ngazi za vijiji, kata na tarafa wanapaswa kuhakikisha wananchi wanapata elimu ya uraia, wanatunza amani na mshikamano, na kuepuka vitendo vyote vinavyoweza kuhatarisha utulivu wa jamii kabla, wakati na baada ya uchaguzi mkuu.

Kwa upande wake, Mkuu wa Jeshi la Polisi Wilaya ya Nanyumbu SSP - Severine Msonda, aliwahakikishia washiriki wa kikao hicho kuwa Jeshi la Polisi limejipanga kikamilifu kuhakikisha hali ya ulinzi na usalama inaendelea kuimarika katika kipindi chote cha uchaguzi, ili wananchi waweze kupiga kura kwa amani na utulivu.

Uchaguzi Mkuu wa mwaka 2025 unatarajiwa kufanyika Jumatano, Oktoba 29, 2025, ukisimamiwa na Tume Huru ya Taifa ya Uchaguzi (INEC), ambapo Watanzania kote nchini watapata fursa ya kuchagua viongozi watakaoongoza kwa kipindi cha miaka mitano(2025 – 2030).