DC Magala Aridhishwa na Kasi ya Ujenzi Miundombinu ya Hospitali ya Mangaka

Posted on: August 17th, 2024

Mkuu wa Wilaya ya Nanyumbu (wa kwanza kushoto) akikagua ujenzi wa miundombinu ya hospitali ya Mangaka

Na, Lunanilo Ngela

Mkuu wa Wilaya ya Nanyumbu, Mheshimiwa Christopher Magala, amefanya ziara katika Hospitali ya Mangaka kukagua ujenzi wa majengo mbalimbali yanayojengwa katika hospitali hiyo, ikiwemo jengo la wagonjwa wa nje (OPD), maabara, na jengo la dawa (pharmacy).

Katika ziara hiyo iliyofanyika Agosti 17, 2024, Mheshimiwa Magala aliwapongeza wasimamizi pamoja na mafundi wanaotekeleza mradi huo wenye thamani ya shilingi milioni 900 kutoka Serikali Kuu, ambao kwa sasa upo hatua ya umaliziaji.

“Nimeridhishwa na maendeleo ya ujenzi, naona kazi inaendelea vizuri,” alisema Mkuu huyo wa Wilaya baada ya kukagua majengo hayo, huku akitoa maagizo ya kuhakikisha mradi huo unakamilika mapema ili kuanza kutoa huduma kwa wananchi.

Kwa upande wake, Mganga Mfawidhi wa Hospitali ya Mangaka, Dkt. Benedict Mbai, alimshukuru Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, kwa kutoa fedha za kufanikisha mradi huo muhimu kwa hospitali hiyo. Alifafanua kuwa Hospitali ya Mangaka, ambayo hapo awali ilikuwa kituo cha afya, ilipandishwa hadhi na kuwa hospitali mnamo Februari 25, 2016.

Serikali imeendelea kutekeleza miradi mbalimbali ya sekta ya afya katika Wilaya ya Nanyumbu, ikiwemo ujenzi wa vituo vya afya na zahanati, hatua ambayo imepunguza kwa kiasi kikubwa changamoto za upatikanaji wa huduma za afya wilayani humo.