DC Magala Afungua Mafunzo ya Jeshi la Akiba Nanyumbu

Posted on: June 10th, 2025

Na, Lunanilo Ngela

Mkuu wa Wilaya ya Nanyumbu, Mhe. Christopher Edward Magala, amezindua rasmi mafunzo ya awali ya Askari wa Jeshi la Akiba katika hafla iliyofanyika Juni 10, 2025 katika viwanja vya Shule ya Msingi Nanjisa, Kijiji cha Namagulivi, Kata ya Chipuputa.

Katika hotuba yake ya uzinduzi, Mhe. Magala aliwapongeza askari wanafunzi kwa kujiunga na mafunzo hayo, akisema kuwa hatua hiyo ni ishara ya uzalendo wa hali ya juu kwa taifa na kwamba ni mfano wa kuigwa katika jamii.

“Ninyi ni nguzo muhimu ya ulinzi wa raia. Taifa linawategemea kulinda amani, mali na watu wake. Mafunzo haya ni mwanzo wa safari muhimu ya kulitumikia taifa,” alisema Mhe. Magala.

Mafunzo hayo ya kozi ya awali yalianza Aprili 23, 2025, na yataendeshwa kwa kipindi cha miezi minne, yakihusisha askari wanafunzi 120.

Kwa upande wake, Mshauri wa Jeshi la Akiba Wilaya ya Nanyumbu, Meja Benedicto Shehoza, alieleza kuwa mafunzo hayo yatawajengea washiriki uwezo katika mbinu mbalimbali ikiwemo kwata, mbinu za kivita, ujanja porini, usalama, shabaha, na uraia.

Aidha, mafunzo haya yanatarajiwa kuimarisha usalama wa ndani katika ngazi ya jamii kwa kuandaa vijana wenye uadilifu na nidhamu ya kijeshi, walio tayari kulituikia taifa.