DC Machali avionya vyama vya ushirika Nanyumbu

Posted on: September 17th, 2018

Mkuu wa Wilaya ya Nanyumbu Mhe. Moses J. Machali akizungumza na wananchi wa Kata ya Kilimanihewa wilayani Nanyumbu

Na, Lunanilo L. Ngela

Korosho ni zao kuu la biashara katika Mikoa ya Mtwara, Lindi na Ruvuma. Zao hili pia ni miongoni mwa mazao makuu ya biashara nchini Tanzania. Katika Mikoa hii mitatu ya kusini yaani Mtwara, Lindi na Ruvuma zao hili huitwa "Dhahabu ya Kusini". Aidha, Serikali ya Tanzania chini ya Uongozi wa Mheshimiwa Rais Magufuli imehakikisha inatafuta soko la uhakika la Korosho na kuinua maisha wakazi wa mikoa yote inayolima korosho.

Mkuu wa Wilaya ya Nanyumbu kwa kutambua umuhimu wa zao la korosho kwa maendeleo ya wananchi wa Wilaya ya Nanyumbu na Taifa kwa ujumla ameweka mikakati ya Wilaya yake ya namna ya kuongeza uzalishaji wa korosho ikiwa ni pamoja na kuusimamia kikamilifu mchakato wa manunuzi ya korosho. Mkuu wa Wilaya amefanya mikutano na vyama vya msingi akitoa maelekezo mbalimbali kwa viongozi wa vyama vya msingi kuhakikisha vinatimiza wajibu wake kikamilifu na kwa uadilifu mkubwa.

Katika Msimu wa Kilimo uliopita wa mwaka 2017/2018 baadhi ya vyama vya msingi havikukamilisha malipo kwa wakulima vikiwemo vyama vya Napacho AMCOS, Kilimanihewa AMCOS, Michiga AMCOS na vingine vingi na kuwaacha wakulima wakiambulia patupu. Wilaya ya Nanyumbu ikishirikiana na Mkuu wa Mkoa wa Mtwara Mhe. Gelasius G. Byakanwa iliwakamata viongozi wote waliosababisha wananchi kutolipwa fedha zao. Viongozi hao wa vyama vya ushirika walishughulikiwa na mkono wa sheria ikiwa ni pamoja na kufilisiwa mali zao ili kulipa fedha ambazo aidha kwa uzembe au kwa maksudi walizipoteza au kuziiba. Baadhi ya viongozi wa ushirika waliondolewa madarakani.

Wilaya ya Nanyumbu katika msimu mpya wa 2018/2019 imeongeza nguvu katika kuhakikisha wananchi wanapulizia mikorosho kwa wakati, kupanda mikorosho mipya ya kisasa na kuihudumia mikorosho yote iliyotelekezwa kwa muda mrefu. Kuzalisha zaidi korosho kutaongeza pato kwa mwananchi mmoja mmoja na Wilaya itapata fedha za kutosha kwa ajili ya maendeleo. Mheshimiwa Machali akizungumza na wanachi wa Wilaya ya Nanyumbu amesisitiza matumizi mazuri ya fedha ikiwa ni pamoja na wazazi kuwekeza katika Elimu. Mkuu wa Wilaya amelaani tabia ya wazazi kuruhusu wasichana wadogo kuolewa ikiwa ni pamoja na kuwakemea wale wote wanaokatisha masomo ya wanafunzi kwa kuwapa mimba. 

Mkuu wa Wilaya akizungumzia Elimu Wilayani Nanyumbu amewahamasisha wafanyabiashara kuwekeza katika Elimu kwa kufungua shule na vyuo binafsi (Private). Ongezeko la shule na vyuo katika ngazi mbalimbali za masomo ni chachu ya maendeleo kwa jamii yeyote. Wilaya ya Nayumbu inatarajia kuanzisha kidato cha tano ifikapo mwaka 2019 katika michepuo ya Sayansi. Aidha, ujenzi wa miundombinu ya shule kuanzia ngazi ya shule za Msingi mpaka Sekondari unaendelea kwa kasi kubwa.