DC Machali aviagiza vyama vya ushirika kuzingatia ubora wa korosho

Posted on: October 24th, 2018

Mkuu wa Wilaya ya Nanyumbu Mhe. Moses Joseph Machali (aliyesimama) akizungumza na viongozi wa vyama vya msingi katika Ukumbi wa Halmashauri ya Wilaya ya Nanyumbu mapema leo Tarehe 24/Octoba/2018

Na, Lunanilo L. Ngela

Mkuu wa Wilaya ya Nanyumbu na Mwenyekiti wa Kamati ya Ulinzi na Usalama ya Wilaya Mhe. Moses Joseph Machali amekutana na viongozi wa vyama vya msingi thelathini na saba (37) vya ushirika wilayani Nanyumbu katika ukumbi wa Halmashauri na kufanya mazungumzo nao ikiwa ni pamoja na kutoa maelekezo mbalimbali ya Serikali. 

Katika kikao hicho, Mhe. Machali amewaagiza viongozi wote wa vyama vya msingi vya ushirika kuhakikisha wanazingatia ubora wa korosho wanazozipokea kutoka kwa wakulima. Mkuu wa Wilaya ameongeza kwa kusema kuwa Wilaya haitasita kuchukua hatua wakati wowote itakapobainika kuwa kuna baadhi ya viongozi wanachukua korosho mbovu au zisizofaa kuingia sokoni na kuharibu taswira ya Wilaya pamoja na Nchi katika soko. Aidha, amewaagiza viongozi wote kuhakikisha msimu wa kilimo 2019/2020 wananunua vifaa/mashine za kupimia ubora wa korosho ili kuepuka usumbufu ambao hujitokeza baada ya korosho kukataliwa katika maghala makuu na kurudishwa kwenye vyama vya msingi zilikotoka.

Mkuu wa Wilaya amekemea pia tabia ya makatibu wa vyama vya msingi kutoandika kiasi chote cha korosho alichouza mkulima, kwa mfano mkulima anaweza kupima korosho zake kilo 785.9 wao wakaandika kilo 785 tu huku pointi ya mbele ikiachwa. Lengo la Serikali ni kuhakikisha Mkulima anapata haki yake yote.

Viongozi wa ushirika wamekumbushwa kutojihusisha na biashara ya korosho nje ya mfumo (kangomba) ikiwa ni pamoja na kuhakikisha wanakuwa makini na kazi yao ili kuleta ufanisi mkubwa katika Msimu huu wa biashara wa mwaka 2018/2019.

Mkuu wa Wilaya akizungumzia soko la korosho amewaambia viongozi wa vyama vya msingi vya ushirika kuwa Serikali ipo bega kwa bega na wakulima katika kuhakikisha wanapata soko zuri la uhakikika. Aidha, amesema kuwa nia ya Serikali chini ya Uongozi wa Mheshimiwa Rais Dr. John Pombe Magufuli ni kuhakikisha mwananchi anafurahia matunda ya kipato cha jasho lake.

Baadhi ya viongozi walioshiriki kikao hicho ni pamoja na Katibu Tawala wa Wilaya ya Nanyumbu Ndg. Salum A. Palango na Mkurugenzi Mtendaji wa Wilaya ya Nanyumbu Ndg. Hamis H. Dambaya ambao kwa pamoja wamewakumbusha viongozi wa vyama vya msingi vya ushirika kuwa waadilifu ikiwa ni pamoja na kufanya kazi kwa bidii.