DC Machali aufurahisha moyo wa Rais Magufuli

Posted on: August 30th, 2018

Mkuu wa Wilaya ya Nanyumbu Mhe. Moses Joseph Machali (kwenye picha) akifanya usafi katika Kituo cha Afya Michiga

Na, Lunanilo L. Ngela

Rais wa Jamhuri ya Muungano wa Tanzania Dr. John Pombe Magufuli hivi karibuni alifanya uteuzi wa Wakuu wa Wilaya pamoja na viongozi wengine katika nafasi mbalimbali za uongozi nchini Tanzania. Lengo la Rais Magufuli ni pamoja na kuziba nafasi zilizokuwa wazi ikiwa ni pamoja na kufanya mabadiliko ya viongozi ili kuharakisha maendeleo ya nchi ya Tanzania katika nyanja mbalimbali. Rais Magufuli ni kiongozi pekee ambaye katika kipindi chake cha uongozi nchini Tanzania amefanikiwa kudhibiti mianya mbalimbali ya ubadhilifu wa mali za umma, uzembe, uvivu wa watumishi wa Serikali,  nidhamu na uwajibikaji. Aidha, ni katika kipindi cha uongozi wa Rais Magufuli ambapo Tanzania imefanikiwa kuwashughulikia mapapa wa ndani na nje ya nchi waliojifanya miungu watu huku wakilinyonya jasho la mtanzania.

Uteuzi wa Mkuu wa Wilaya ya Nanyumbu Mhe. Moses Joseph machali umekuwa faraja jipya kwa wananchi wa Wilaya ya Nanyumbu baada ya kukaa kwa kipindi kirefu bila Mkuu wa Wilaya. Mheshimiwa Machali katika kipindi kifupi cha uongozi wake amefanikiwa kutafsiri maagizo aliyopewa na Rais Magufuli ya kuhakikisha Nanyumbu inapiga hatua kiuchumi, kijamii, kisiasa na kiutamaduni.

Lengo la Serikali ni kuhakikisha huduma za afya zinakwenda mpaka vijijini. Mhe, Machali amewaagiza watendaji kuhakikisha kila kijiji zinatengenezwa kombora kwa ajili ya kufyatulia tofari ifikapo kiangazi mwakani ili kuhakikisha zahanati zinajengwa kila kijiji. Aidha, ujenzi huo utaenda sambamba na ujenzi wa shule za msingi katika vijiji visivyokuwa na shule pamoja na sekondari kwa kata zote ambazo hazina sekondari mpaka sasa. "Tutakimbia pamoja" anasema Mkuu wa Wilaya akionesha msisitizo wa namna alivyojipanga na wasaidizi wake katika kuharakisha maendeleo ya Wilaya ya Nanyumbu.

Mkuu wa Wilaya amesisitiza kuwa ni lazima mwaka 2019 kidato cha tano kuanza katika mchepuo wa Sayansi ili kuwapatia haki ya kuendelea na masomo wanafunzi wote wanafaulu vizuri kidato cha nne. Akizungumzia Elimu, Mhe. Machali amewaagiza walimu kutimiza wajibu wao ikiwa ni pamoja na wakaguzi kuhakikisha wanazikagua shule zote. Aidha, Mkuu wa Wilaya amewaagiza Maaafisa Elimu pamoja na kitengo cha Utumishi wa Walimu (TSC) kuhakikisha wanawatendea haki walimu.

Mheshimiwa Machali hutumia asilimia sitini (60%) ya mda wake kuwa vijijini kushughulikia kero za wananchi ikiwa ni pamoja na kukagua utekelezaji wa miradi ya maendeleo. Akishirikiana na Kamati ya Ulinzi na Usalama ya Wilaya Mhe. Machali amefanikiwa kuumaliza mgogoro wa wakulima na wafugaji katika kijiji cha Lukula ambako wiki chache zilizopita mifugo 36 iliuwawa. Pamoja na kusuluhisha mgogoro huo Mhe. Machali ameagiza kutengenezwa kwa mpango bora wa matumizi ya ardhi unaoonesha maeneo ya wakulima na wafugaji.

"Nanyumbu inapaswa kuwa salama" anasema Mhe. Machali. Ni marufuku kuharibu mazingira kwa kuchoma misitu. Mkuu wa Wilaya pia ameagiza kuhakikisha kila nyumba inakuwa na choo cha kudumu, kufanya usafi wa mazingira ikiwa ni pamoja na kuwafichuwa wale wote wanaohatarisha amani ya nchi. Mkuu wa Wilaya ameanza ziara ya kutembelea vyama vyote 37 vya msingi huku akitoa maelekezo mbalimbali kwa ajili ya maandalizi ya ununuzi wa korosho kwa msimu wa 2018/2019.