DAS Kanyinda Apongeza Mchango wa Mashirika Yasiyo ya Kiserikali Nanyumbu

Posted on: June 21st, 2025

Na, Lunanilo Ngela

Katibu Tawala wa Wilaya ya Nanyumbu, Ndg. Juma Said Kanyinda, ameyapongeza mashirika yasiyo ya kiserikali yanayotekeleza shughuli zake wilayani humo kwa mchango wao mkubwa katika kuchochea maendeleo ya kijamii na kiuchumi katika maeneo mbalimbali.

Ndg. Kanyinda alitoa pongezi hizo tarehe Juni 21, 2025, wakati akimwakilisha Mkuu wa Wilaya ya Nanyumbu kwenye Jukwaa la Mwaka la Mashirika Yasiyo ya Kiserikali (NGOs), lililofanyika katika ukumbi wa mikutano wa Halmashauri.

Amesema kuwa mashirika hayo yamekuwa washirika muhimu wa Serikali katika kufanikisha utekelezaji wa miradi ya maendeleo kwenye sekta mbalimbali kama vile afya, elimu, kilimo, utunzaji wa mazingira, utawala bora, pamoja na uwezeshaji wa jamii. Aidha, alieleza kuwa mashirika hayo yamechangia katika kutoa ajira kwa wananchi kupitia programu mbalimbali zinazotekelezwa katika maeneo ya vijiji na mitaa.

Awali, Kaimu Mkurugenzi Mtendaji wa Halmashauri ya Wilaya ya Nanyumbu, Ndg. Philipo Sengela, alisema kuwa jukwaa hilo hutoa fursa kwa mashirika husika kuwasilisha na kujadili taarifa za utekelezaji wa shughuli zao. Aliongeza kuwa jumla ya mashirika saba yaliwasilisha taarifa katika jukwaa hilo, yakieleza namna yalivyotekeleza majukumu yao kwa kipindi cha miaka mitano.

Kwa upande wao, baadhi ya viongozi wa mashirika walieleza kuwa changamoto kubwa inayowakabili ni ukosefu wa rasilimali fedha, jambo linalokwamisha utekelezaji wa baadhi ya mipango yao ya maendeleo. Hata hivyo, walibainisha kuwa pamoja na changamoto hiyo, mashirika yao yameendelea kuwa chachu ya mabadiliko chanya katika jamii.

Mmoja wa washiriki wa jukwaa hilo, Ndg. Dickson Mwichaha kutoka Shirika la Msaada wa Kisheria, alieleza namna shirika hilo lilivyosaidia kutatua migogoro ya kifamilia, hasa migogoro ya ndoa, ikiwa ni pamoja na kusaidia wanaume waliokuwa wakinyanyaswa majumbani, hivyo kuchangia kuimarisha amani katika familia.

Kaulimbiu ya Jukwaa la Mwaka 2025 ni: “Tathmini ya Mchango wa Mashirika Yasiyo ya Kiserikali Katika Maendeleo ya Taifa 2020/2021 – 2024/2025.”