Baraza la Madiwani Nanyumbu lakutana kujadili hoja za CAG 2016/2017

Posted on: July 16th, 2018

Mkuu wa Mkoa wa Mtwara Mh. Gelasius Gaspar Byakanwa akizungumza katika mkutano maalumu wa Baraza la Madiwani lililokutana kujadili Hoja za Mdhibiti na Mkaguzi wa Hesabu za Serikali kwa kipindi kinachoishia Juni 30, 2017

Halmashauri ya Wilaya ya Nanyumbu iliandaa hesabu zake kwa kipindi kinachoishia Juni 30, 2017 kwa kuzingatia viwango na vigezo vya ufungaji wa hesabu kwa taasisi za Umma (IPSAS) na taarifa hizo kukabidhiwa kwa Mh. Rais wa Jamhuri ya Muungano wa Tanzania. Nanyumbu imepata Hati safi (Unqualified Opinion). Jukumu la Mdhibiti na Mkaguzi Mkuu wa fedha za Serikali ni kukagua fedha zote za Serikali Kwa mujibu wa Ibara ya 143 ya katiba ya Jamhuri wa Muungano wa Tanzania, 1977 (kama ilivyorejewa  2005) na kifungu cha 45 na 48(1) cha Sheria ya Fedha za Serikali za mitaa No 9 ya 1982 (kama ilivyorejewa  2000) pamoja na kifungu cha 10(1) cha Sheria ya Ukaguzi No 11 ya mwaka 2008.

Mkurugenzi Mtendaji wa Wilaya ya Nanyumbu Ndg Hamis H. Dambaya amesema kuwa pamoja na Nanyumbu kupata Hati Safi, kuna mambo ya msisitizo ambayo Mdhibiti na Mkaguzi Mkuu wa fedha za Serikali alisisitiza na kuitaka menejimenti kutoa majibu. Aidha Halmashauri imetoa majibu kwa hoja zote 25 ndani ya siku 21 kama sheria ya ukaguzi No 11 ya mwaka 2008 inavyoelekeza.

Mkuu wa Mkoa wa Mtwara Mh. Gelasius Gaspar Byakanwa akizungumza katika Mkutano huo ameipongeza Nanyumbu kwa kupata Hati safi. Aidha, Ameitaka Halmashauri kuhakikisha inakuwa makini ili kuepuka hoja. Mkuu wa Mkoa amesema ni mhimu kwa Halmashauri kuomba ushauri wa CAG hasa kwenye zabuni zote kubwa ili kuepusha hoja.  Mh. Byakanwa amekemea tabia ya wanasheria wa Halmashauri kupoteza au kushindwa kesi mahakamani kwa makusudi na kusababisha hasara kwa Serikali. Aidha, ameitaka Halmashauri  iweke kipaombele katika kulipa madeni, kuongeza vyanzo vya mapato ya Halmashauri na kuvisimamia ikiwa ni pamoja na kushirikiana bega kwa bega na Mkaguzi wa ndani ambaye ni jicho la Halmashauri.

Mkutano wa Baraza la Madiwani umekamilika katika Ukumbi wa Halmashauri ya Wilaya ya Nanyumbu huku Waheshimiwa madiwani wakiweka mikakati mbalimbali ya kuhakikisha Halmashauri haipati hoja katika mwaka wa fedha 2017/2018.