Baraza la Madiwani Nanyumbu kujadili Makadirio ya Bajeti 2019/2020

Posted on: February 26th, 2019

Makamu Mwenyekiti wa Halmashauri ya Wilaya ya Nanyumbu Mhe. Benjamin R. Masimbo akifungua Mkutano wa Baraza la Madiwani ulilofanyika  katika Ukumbi wa Halmashauri

Na, Lunanilo L. Ngela

Baraza la Madiwani Nanyumbu limekutana mapema leo ili kujadili mapitio ya Bajeti ya Halmashauri kwa Mwaka 2017/2018, nusu mwaka 2018/2019 na Makadirio ya Mapato na Matumizi kwa Mwaka 2019/2020. Aidha, Halmashauri ya Wilaya ya Nanyumbu inakadiria kukusanya Shilingi 24,361,006,904.00 katika mwaka wa Fedha 2019/2020.

Utekelezaji wa Bajeti ya Halmashauri unaongozwa na Dira ya Taifa ya Maendeleo (2025), Malengo ya Maendeleo Endelevu (2030), Mpango wa Pili wa Maendeleo wa miaka mitano (2016/2017 - 2020/2021), Ilani ya Uchaguzi ya Chama Tawala (2015-2020), Mipango  Mikakati ya  Mkoa, Mpango Mkakati wa Halmashauri, Hotuba ya Mhe. Rais wakati akizindua Bunge la 11 pamoja na maelekezo mbalimbali ya Serikali.

Nanyumbu katika Bajeti ya Mwaka 2019/2020 imeweka vipaumbele katika kuongeza mapato ya ndani, upatikanaji wa huduma ya maji safi na salama, uboreshaji wa miundombinu ya Sekta ya Elimu na Afya, kuimarisha shughuli za kilimo, utafiti na uhifadhi wa mazao, uandaaji wa mazingira wezeshi kwa ajili ya ujenzi wa viwanda, kukamilisha ujenzi wa stendi ya mabasi Mangaka ikiwa ni pamoja na kuhakikisha Ulinzi na Usalama unaimarishwa.

Mbunge wa Jimbo la Nanyumbu Mhe. Dua W. Nkurua akizungumza katika mkutano huo amewakumbusha watendaji wa Halmashauri kuhakikisha wanakusanya mapato kwa bidii ikiwa ni pamoja na kuibua vyanzo vipya vya mapato kwa Halmashauri ili kufanikisha utekelezaji wa miradi ya Maendeleo. Aidha, Mhe. Dua amemshukuru sana Rais wa Jamhuri ya Muungano wa Tanzania Mhe. Dr. John Pombe Magufuli kwa kuipatia Nanyumbu Fedha mbalimbali za Miradi ya Maendeleo.

Ofisi ya Habari imeongea na Katibu Tawala wa Wilaya ya Nanyumbu Ndg. Salumu A. Palango ambaye amesisitiza umoja na ushirikiano kwa watendaji wa Serikali ngazi ya  Wilaya ili kuharakisha maendeleo. Baadhi ya Wananchi waliozungumza na Ofisi ya Habari wameiomba Halmashauri kupeleka bajeti ya kutosha katika sekta ya maji ili kupunguza kero kubwa ya maji wanayoipata na hasa baada ya kumalizika kwa kipindi  cha mvua