Afisa Mwandikishaji Nanyumbu Awataka Washiriki wa Mafunzo Kuhakikisha Zoezi la Uboreshaji wa Daftari la Wapiga Kura Linatekelezwa kwa Ufanisi

Posted on: May 14th, 2025

Na, Lunanilo Ngela

Afisa Mwandikishaji wa Jimbo la Nanyumbu, Ndg. Juma Rajabu Njaro, amewataka waandishi wasaidizi na waendesha vifaa vya bayometriki kuhakikisha wanazingatia kwa makini mafunzo waliyopewa ili kutekeleza kwa ufanisi zoezi la uboreshaji wa Daftari la Kudumu la Wapiga Kura, awamu ya pili.

Akizungumza Mei 14, 2025, wakati wa kufungua rasmi mafunzo hayo yaliyofanyika katika ukumbi wa Shule ya Sekondari Mkapa, Wilaya ya Nanyumbu, Ndg. Njaro alisema kuwa ufanisi wa zoezi hilo unategemea umahiri na uadilifu wa wahusika wote.

“Mafunzo haya ni msingi wa maandalizi bora ya kazi yenu. Tunategemea kila mmoja wenu atatumia vyema ujuzi huu kuhakikisha kila mwenye sifa ya kujiandikisha anahudumiwa kwa wakati, kwa uadilifu na kwa usahihi,” alisema Ndg. Njaro.

Mafunzo hayo yamelenga kuwajengea uwezo waandishi wasaidizi na waendesha vifaa vya bayometriki kabla ya kuanza kwa zoezi la uboreshaji wa Daftari la Kudumu la Wapiga Kura, awamu ya pili, litakalofanyika kuanzia Mei 16 hadi Mei 22, 2025 katika Jimbo la Nanyumbu.

Katika awamu hiyo, raia wa Tanzania wenye sifa ya kupiga kura ambao hawakuandikishwa awali watapata fursa ya kujiandikisha katika vituo maalum vitakavyowekwa katika kila kata.

“Kujiandikisha Kuwa Mpiga Kura ni Msingi wa Uchaguzi Bora”