Baraza la Madiwani Nanyumbu lakutana kujadili Rasimu ya Mpango wa Bajeti 2020/2021

Posted on: February 13th, 2020

Mbunge wa Jimbo la Nanyumbu Mhe. Dua Willium Nkurua (aliyesimama) akichangia hoja katika Mkutano wa Baraza la Madiwani

Na, Lunanilo L. Ngela

Baraza la Madiwani wa Halmashauri ya Wilaya ya Nanyumbu limeketi mapema leo Februari 13, 2020 ili kufanya mapitio ya Bajeti kwa Mwaka 2018/2019, nusu Mwaka 2019/2020 na Rasimu ya Makadirio ya Mapato na Matumizi kwa Mwaka 2020/2021.

Utekelezaji wa Bajeti hiyo unaongozwa na Dira ya Taifa ya Maendeleo (2025), Malengo ya Maendeleo Endelevu (2030), Mpango wa Pili wa Maendeleo wa miaka mitano (2016/2017 - 2020/2021), Ilani ya Uchaguzi ya Chama Tawala (2015-2020), Mpango mkakati wa Mkoa, Mpango Mkakati wa Halmashauri, Hotuba ya Mhe. Rais katika uzinduzi wa Bunge la 11 na maelekezo mbalimbali ya Serikali.

Akiwasilisha Bajeti hiyo Ndg. Ponsiani Kazee (Afisa Mipango) kwa niaba ya Mkurugenzi Mtendaji, amesema kuwa vipaumbele katika Bajeti ya 2020/2021 ni pamoja na Kuongeza mapato ya ndani, Uboreshaji wa Miundombinu, kuimarisha shughuli za Kilimo, kuandaa mazingira wezeshi ya Ujenzi wa Viwanda na kuimarisha Ulinzi na Usalama.

Mheshimiwa Dua William Nkurua (Mbunge) akizungumza katika Mkutano huo amesisitiza Ujenzi wa Kituo Cha Afya Mikangaula kuanza mara moja ili kurahisisha upatikanaji wa huduma za Afya.