Zahanati ya Msinyasi yatarajiwa kuanza kutumika Mei Mosi 2023

Posted on: April 14th, 2023

Katika picha ni baadhi ya wananchi wa Kijiji cha Msinyasi wakiwa na Mkurugenzi Mtendaji wa Halmashauri Ndg. Ibrahim John Mwanauta (wa pili kushoto)

Na, Lunanilo Ngela 

Mkurugenzi Mtendaji wa Halmashauri ya Wilaya ya Nanyumbu Ndg. Ibrahim John Mwanauta ameiagiza kamati ya Ujenzi wa zahanati ya Kijiji cha Msinyasi kukamilisha ujenzi wa zahanati hiyo haraka ili ianze kutoa huduma kwa wananchi ifikapo Mei 1, 2023

Mkurugenzi huyo ametoa maelekezo hayo kijijini hapo alipotembelea ujenzi wa zahanati hiyo mapema leo Aprili 14, 2023 ili kujua changamoto zinazochelewesha mradi huo kukamilika mapema.

Akizungumzia juu ya mradi huo ambao uliingiziwa shilingi Milioni 60 na Serikali ambapo Serikali kuu ilitowa milioni 50 na Halmashauri kutoa milioni 10 kupitia mapato ya ndani, Mkurugenzi Mtendaji amesema kuwa, nia ya serikali ni kuhakikisha wananchi wanapatiwa huduma bora za Afya na za uhakika.

Mkurugenzi Mtendaji ameahidi kutoa shilingi Milioni moja kuunga mkono nguvu za wananchi katika ujenzi wa vyoo vya zahanati hiyo ili kuwezesha zahanati hiyo kuanza kutumika.

Diwani wa Kata ya Likokona Mhe. Joseph M. Omari, Mwenyekiti wa Kijiji Ndg. Hassan Chikomo Bikwela na Mtendaji wa Kijiji Bi. Afsati A. Hamisi wamemweleza Mkurugenzi Mtendaji kuwa hatua inayoendelea sasa ni utengenezaji wa milango ya zahanati hiyo, ujenzi wa choo pamoja na maandalizi mengine ya lazima ili kuiwezesha zahanati hiyo kuanza kazi. Aidha, wananchi wa Kijiji hicho wameishukuru Serikali kwa kuwaunga mkono katika ujenzi wa zahanati hiyo.