Mwenge wa Uhuru kuwasili Nanyumbu Aprili 10, 2023

Posted on: April 6th, 2023

Mkuu wa Wilaya ya Nanyumbu Mhe. Mariam Khatibu Chaurembo (katikati) akizungumza na wajumbe wa Kamati ya Maandalizi ya Mwenge Wilaya

Na, Lunanilo L. Ngela,

Mkuu wa Wilaya ya Nanyumbu Mhe. Mariam Chaurembo ameongoza kikao cha wajumbe wa Kamati ya Mwenge ya Wilaya mapema leo Aprili 6, 2023 ikiwa ni kikao cha mwisho cha maandalizi ya  mapokezi ya Mbio za Mwenge wa Uhuru utakaowasili wilayani hapo siku ya Jumatatu ya tarehe 10 Aprili, 2023 katika Kijiji cha Namatumbusi na kukimbizwa katika maeneo mbalimbali ya Wilaya huku ukiweka Mawe ya Msingi, kuzindua, kuona na kukagua miradi mbalimbali ya maendeleo.

Miongoni mwa miradi itakayofikiwa na Mwenge wa Uhuru wilayani Nanyumbu ni pamoja na  Mradi wa ujenzi wa madarasa mawili ya shule ya Sekondari Mikangaula, ujenzi wa miundombinu ya Jengo la Uhamiaji la Wilaya, ujenzi wa Jengo la Dharura la Hospitali ya Mangaka (EMD), ujenzi wa Barabara kiwango cha Lami Bomani- Mangaka Nachingwea Boarder, kuona na kukagua Vikundi vya  Mfuko Wa Wanawake, Vijana Na Watu Wenye Ulemavu ikiwa ni pamoja na zoezi la upandaji wa miti katika mradi  wa maji mjini Mangaka. Aidha, mkesha wa Mwenge wa Uhuru utakuwa viwanja vya stendi ya mabasi Mangaka.

Kauli Mbiu katika Mbio za Mwenge wa Uhuru kwa Mwaka 2023 ni “Tunza Mazingira, Okoa Vyanzo vya Maji kwa Ustawi wa Viumbe Hai na Uchumi wa Taifa.”

WOTE MNAKARIBISHWA