Wanakijiji Chihuve Wamshukuru Rais Samia kwa Mradi wa Daraja Mto Masyalele

Posted on: August 18th, 2024

Mkuu wa Wilaya ya Nanyumbu (wa pili kulia) akimsikiliza meneja wa TARURA

Na, Lunanilo Ngela

Wananchi wa Kijiji cha Chihuve, Wilaya ya Nanyumbu, wamemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuwapelekea mradi wa ujenzi wa daraja katika Mto Masyalele.

Shukrani hizo zilitolewa mbele ya Mkuu wa Wilaya ya Nanyumbu, Mhe. Christopher Magala, ambaye alifanya ziara kijijini hapo tarehe 17 Agosti 2024, kukagua maendeleo ya ujenzi wa daraja hilo lenye urefu wa mita 21, linalojengwa katika barabara ya Kalipinde – Chihuve kwa gharama ya shilingi milioni 120.5.

Akizungumza wakati wa ziara hiyo, mmoja wa wanakijiji alieleza jinsi walivyokuwa wakikumbana na changamoto kubwa ya kuvuka mto huo wakati wa msimu wa mvua, ambapo kijiji chao kilikuwa kama kisiwa. "Tulikuwa hatuwezi kuvuka mto wakati wa mvua, lakini sasa tunamshukuru sana Mhe. Dkt. Samia Suluhu Hassan kwa kutuletea mradi huu muhimu," alisisitiza mwanakijiji huyo.

Kwa upande wake, Mkuu wa Wilaya ya Nanyumbu amewataka wananchi wa Kijiji cha Chihuve kutunza daraja hilo na kulinda miundombinu mingine inayojengwa na serikali katika kijiji hicho. Pia, aliwasihi kutoa taarifa kwenye vyombo vya dola wanapobaini mtu yeyote anayehujumu miundombinu hiyo.

Naye Meneja wa Wakala wa Barabara za Vijijini na Mijini (TARURA), Mhandisi Hussein Mwombeki, amesema kuwa mradi wa ujenzi wa Daraja la Mawe katika Mto Masyalele unatekelezwa na kampuni ya CENTRAL HIGHWAY CONTRACTORS LTD na tayari umefikia asilimia 80 ya utekelezaji. Aidha, daraja hilo likikamilika, linatarajiwa kuboresha mawasiliano na kukuza uchumi wa kijiji hicho pamoja na maeneo ya jirani.