Ufuta wauzwa shilingi 3,570 hadi 3,350 mnada wa MAMCU Nanyumbu

Posted on: July 19th, 2024

Na, Lunanilo Ngela

Mnada wa sita wa ufuta kwa Chama Kikuu cha Ushirika MAMCU umefanyika Wilaya ya Nanyumbu Julai 19, 2024 ambapo jumla ya tani 1,774.1 za ufuta kutoka maghala 11 ya Mkoa wa Mtwara zimeuzwa.

Akitangaza bei ya ufuta baada ya mnada huo, Meneja wa Tawi, Ndg. Costantine Leula, alisema kuwa bei ya juu ya ufuta ilikuwa shilingi 3,570 kwa kilo huku bei ya chini ikiwa shilingi 3,350.

Meneja Leula aliongeza kuwa minada mitano ya awali ilifanyika kati ya Juni 14, 2024 na Julai 12, 2024 katika wilaya za Masasi, Nanyumbu, Mtwara, na Nanyamba ambapo jumla ya tani 25,776 ziliuzwa kwa shilingi bilioni 84.6.

Afisa Usimamizi Fedha wa TMX (Tanzania Mercantile Exchange PLC), Ndg. Prince Mng’ong’o, alisema kuwa bei ya ufuta imeendelea kuimarika katika minada hiyo iliyofanyika mtandaoni kutokana na wanunuzi wengi kujitokeza huku kukiwa na uhitaji mkubwa wa zao hilo sokoni.

“Tumeshuhudia bei nzuri ya ufuta, na tunashukuru inaendelea kupanda,” alisema Ndg. Dadi Abdallah, mmoja wa wakulima waliohudhuria mnada huo. Aliongeza kuwa bei hiyo imewahamasisha kuongeza uzalishaji kwa msimu ujao.