Ubunifu wa zana za kujifunza na kujifunzia na maonesho ya kisayansi vyamkosha roho DC Chaurembo

Posted on: March 3rd, 2023

Mwanafunzi wa shule ya sekondari akionesha zana mbalimbali za kibaiolojia mbele ya Mkuu wa Wilaya Mhe. Mariam Chaurembo (wa kwanza kushoto)

Na, Lunanilo Ngela

Mkuu wa Wilaya ya Nanyumbu Mhe. Mariam Khatibu Chaurembo ametembelea mabanda ya maonesho ya kielimu katika shule ya Msingi Mangaka kwenye maadhimisho ya Juma la Elimu na kuwapongeza walimu kwa kuandaa zana bora za kufundishia na kujifunzia zinazolenga kumwezesha mwanafunzi kuyafikia maarifa yaliyokusudiwa kwa wepesi.

Akizungumza katika mabanda hayo Mhe. Chaurembo amesema kuwa ni mhimu darasa kuwa na zana hizo ili kumrahisishia mwanafunzi kupata maarifa na ujuzi unaokusudiwa. Aidha, amewapongeza wanafunzi wa shule za msingi na sekondari walioonesha ubunifu wao katika nyanja mbalimbali za kisayansi.

Katika kuadhimisho Juma la Elimu wilayani Nanyumbu, Mkuu wa Wilaya ametoa vyeti vya pongezi kwa walimu na shule zilizofanya vizuri katika mitihani ya Taifa ikiwa ni pamoja na kuwapatia maafisa Elimu Kata mafuta ya pikipiki lita 170 ili kuwarahisishia maafisa hao kuzifikia shule zao kwa wepesi ili kufaya ufuatiliaji wa maswala yahusuyo elimu.

Kauli mbiu ya maadhimisho ya Juma la Elimu ni; Tuwajibike kwa Pamoja, kuleta Maendeleo ya Elimu Mtwara.