Taarifa ya Utekelezaji wa Ilani yakonga nyoyo za wajumbe wa CCM Nanyumbu

Posted on: December 8th, 2023

Na; Lunanilo Ngela

Mwenyekiti wa Chama Cha Mapinduzi Wilaya ya Nanyumbu Ndg. Rashid Ally Mrope ameongoza Kikao cha Halmashauri Kuu ya Chama Cha Mapinduzi Wilaya kilichofanyika katika Ukumbi wa mikutano wa Halmashauri ambapo wajumbe wamepokea na kujadili Taarifa ya Utekelezaji wa Ilani ya CCM kwa kipindi cha Julai 2023 hadi Disemba 31, 2023.

Akiwasilisha Taarifa ya Mafaniko ya Utekelezaji wa Ilani ya Uchaguzi, Mkuu wa Wilaya ya Nanyumbu Mhe. Dkt. Stephen Isaac Mwakajumilo amesema kuwa, shughuli zilizotekelezwa zinatokana na Mpango wa Bajeti ya Maendeleo 2023/2024 unaolenga kuboresha utoaji wa huduma katika Sekta za Elimu, Afya, Kilimo na Mifugo, Ushirika, Maji, Barabara na Maendeleo ya Jamii. 

Nae Kaimu Mkurugenzi Mtendaji wa Halmashauri ya Wilaya ya Nanyumbu Ndg. Rudrick Charles amewaeleza wajumbe wa Kikao hicho kuwa, Halmashauri imeidhinishiwa kutekeleza Miradi ya Maendeleo yenye thamani ya Shilingi Bilioni 8.1 kwa mwaka wa Fedha 2023/2024.

Aidha, hadi kufikia Novemba, 2023 Halmashauri imepokea na kukusanya Shilingi Bilioni 4.5 kwa ajili ya utekelezaji wa Miradi ya Maendeleo, fedha ambazo zinatokana na mapato ya ndani ya Halmashauri, michango ya nguvu za wananchi, Ruzuku kutoka Serikali Kuu pamoja na Fedha za wahisani.

Taarifa ya Utekelezaji wa Ilani imepokelewa na kukubaliwa na wajumbe wa Kikao ambao siku chache kabla ya Kikao walitembelea na kukagua miradi mbalimbali ya Maendeleo inayotekelezwa Wilaya ya Nanyumbu.