Serikali yatoa shilingi milioni 377.6 kwa wanufaika wa TASAF Nanyumbu

Posted on: July 5th, 2024

Na, Lunanilo Ngela

Jumla ya shilingi milioni 377.6 zimetolewa na Serikali kwa wanufaika 8,219 wa Mradi wa Mfuko wa Maendeleo ya Jamii (TASAF) katika Wilaya ya Nanyumbu kwa mwezi Machi na Aprili katika bajeti ya mwaka wa fedha 2023/2024.

Fedha hizi ni utekelezaji wa mpango wa Serikali ulioanzishwa kwa lengo la kutoa msaada wa kifedha na mafunzo kwa kaya maskini nchini. Mradi huu ni sehemu ya juhudi za kupunguza umaskini na kuboresha maisha ya wananchi, hususan wale wanaoishi vijijini.   

Wakizungumza wakati wa malipo hayo baadhi ya wanufaika wa Wilaya ya Nanyumbu wamesema kuwa, Mpango huo umeleta matumaini mapya kwa kaya maskini na kuwapa fursa ya kujikwamua kutoka katika hali ya umaskini.

“Fedha hii hunisaidia kununua chakula, lakini pia zimeniwezesha kuanzisha mradi wa kufuga kuku”, alieleza mmoja ya wanufaika wa TASAF katika Kijiji cha mchangani A.

Aidha, walengwa wametekeleza miradi ya ajira za muda katika awamu hii ikiwemo ujenzi wa matanki 21 ya kuvunia maji ya mvua, upandaji wa miti 17,145, utengenezaji wa barabara 25 za jamii zenye urefu wa kilomita 28, na ukarabati wa bwawa moja la asili (kingamaji) lenye ujazo wa lita 40,000.