Nanyumbu yapewa gari jipya la kisasa la wagonjwa

Posted on: August 20th, 2020

Mkuu wa Mkoa wa Mtwara Mhe. Gelasius G. Byakanwa akiendesha gari jipya la Kisasa  la wagonjwa (ambulance) baada ya kulizindua katika viwanja vya mikutano mjini Mangaka

Na, Lunanilo L. Ngela

Akikabidhi gari hiyo aina ya Mercedes-Benz iliyotolewa na kampuni ya ARA Petroleum Tanzania Limited inayojishughulisha na uchimbaji wa mafuta na gesi, Mkuu wa Mkoa wa Mtwara ameutaka uongozi wa Wilaya ya Nanyumbu kulitunza gari hilo lililoletwa ili kutatua changamoto ya uhaba wa magari ya kubebea wagonjwa (ambulance).

Mkuu huyo wa Mkoa pamoja na shukrani zake za dhati kwa kampuni ya ARA Petroleum Tanzania Limited iliyotoa msaada huo wa gari ya wagonjwa, ameendelea kuwakaribisha wawekezaji kuja kuwekeza katika Mkoa wa Mtwara.

Serikali wilayani Nanyumbu inatekeleza Miradi mbalimbali ya ujenzi wa miundombinu ya Afya ikiwemo Kituo cha Afya Mbambaswala kilichogharimu Shilingi milioni 400, Ujenzi wa wodi ya wazazi hospitali ya Mangaka unaogharimu shilingi Milioni 400, ujenzi wa kituo cha Afya Mikangaula Milioni 200 na ujenzi wa jengo la kisasa la mionzi (X-Ray) katika Hopitali ya Wilaya. Aidha, kwa Mwaka 2019/2020, Wilaya inatekeleza miradi ya Ujenzi wa vyoo (WASH) katika vituo vya kutolea huduma za Afya unaofadhiliwa na Benki Kuu ya Dunia.

Mkuu wa Wilaya ya Nanyumbu Mhe. Moses J. Machali amemshukuru Mkuu wa Mkoa kwa kuipatia Nanyumbu gari hiyo iliyotolewa na wafadhili. Aidha, ametowa pongeza za dhati kwa Rais wa Jamhuri ya Muungano wa Tanzania Dr, John Pombe Magufuli kwa kuipatia Nanyumbu fedha za utekelezaji wa Miradi mbalimbali ya Maendeleo ikiwemo Miradi ya kimkakati.