Nanyumbu yakabidhi hundi ya mikopo kwa vikundi vya wanawake vijana na walemavu

Posted on: May 21st, 2020

Afisa Mendeleo ya Jamii  Ndg. Philip Sengela (wa kwanza kulia) katika picha ya pamoja na maafisa maendeleo ya jamii pamoja na vikundi vya wanawake vijana na walemavu  

Na, Lunanilo L. Ngela

Halmashauri ya Wilaya ya Nanyumbu katika kutekeleza Sera ya utoaji wa mikopo kwa vikundi vya Wanawake Vijana na Walemavu katika Mwaka wa Fedha 2019/2020 imetenga Shilingi 162,309,800.00 ili kutoa mikopo kwa vikundi 50 vikiwemo vikundi 20 vya wanawake, vikundi 20 vijana na vikundi 10 vya Walemavu.

Mwenyekiti wa Halmashauri Ndg. Ahamad B. Mchopa akikabidhi Hundi ya Shilingi milioni 27 mapema leo, amewataka wanavikundi hao kuzitumia vizuri Fedha hizo ili kuwainua kiuchumi. Aidha Fedha hizo zimetolewa ikiwa ni awamu ya pili huku awamu ya kwanza Halmashauri ikiwa imetoa Mkopo wa Shilingi milioni 63

Mkurugenzi Mtendaji wa Halmashauri Ndg. Hamis H. Dambaya akizungumza katika hafla hiyo amesema kuwa Halmashauri itaendelea kutenga asilimia 10 kila mwaka katika mapato yake ya ndani ili kukopesha vikundi vilivyosajiliwa vya Wanawake, Vijana na Walemavu.

Nae Bi. Angela Aore akizungumza kwa niaba ya Afisa Maendeleo ya Jamii amesema kuwa, vikundi vilivyopewa mikopo vimepatiwa mafunzo ya uendeshaji na usimamizi wa miradi ya vikundi, utunzaji wa kumbukumbu za fedha na kalenda ya marejesho.

Vikundi vilivyopewa mkopo katika hafla hiyo vikiwakilishwa na Bi. Crala Simoni Awali (kutoka kundi la Walemavu) vimetoa shukrani zao za dhati kwa Rais wa Jamhuri ya Muungano wa Tanzania Mhe. Dr John Pombe Magufuli na Halmashauri ya Nanyumbu kwa kutoa fedha hizo ambazo zitawainua kiuchumi. Aidha, vikundi hivyo vimeahidi kuzitumia fedha hizo vizuri na kurejesha mikopo yao kwa wakati.