Nanyumbu yafanya mafunzo kwa wasimamizi wa Uchaguzi ngazi ya Kata

Posted on: August 9th, 2020

Msimamizi wa Uchaguzi Jimbo la Nanyumbu Ndg. Hamis H. Dambaya (aliyesimama) akihitimisha mafunzo katika ukumbi wa Halmashauri  

Na, Lunanilo L. Ngela

Maafisa wasimamizi wa Uchaguzi ngazi ya Kata jimboni Nanyumbu, wamepewa mafunzo ya siku tatu ili kuwajengea uwezo wa kuratibu na kusimamia shughuli za Uchaguzi mkuu utakaofanyika Oktoba 28, mwaka huu.

Msimamizi wa Uchaguzi Jimbo la Nanyumbu Ndg. Hamis H. Dambaya, amewataka wasimamizi wa Uchaguzi katika Jimbo hilo kusimamia Uchaguzi mkuu kwa kufuata sheria na taratibu zilizowekwa. Aidha, amewataka wasimamizi hao kusimamia uchaguzi huo kwa weledi.

Afisa Uchaguzi wa Wilaya ya Nanyumbu Ndg. Hamza S. Mnaliwa pamoja na kuwapongeza maafisa hao kwa kushiriki vema mafunzo, amewataka washiriki hao kuzingatia matumizi sahihi ya vitendea kazi vya uchaguzi ikiwa ni pamoja na kusimamia vema uchaguzi. Katika mafunzo hayo Washiriki walikula kiapo mbele ya Hakimu wa Wilaya Mhe. Christopher J. David.

Uchaguzi mkuu wa kumchagua Rais wa Jamhuri ya Muungano wa Tanzania, wabunge na madiwani utafanyika Tarehe 28/10/2020. Aidha, Tarehe 12-25/08/2020 wagombea wa Ubunge na udiwani watachukua fomu za kugombea na kuzirejesha tarehe 25/08/2020. Katika Wilaya ya Nanyumbu wagombea udiwani watachukua fomu Ofisi za Kata na wagombea Ubunge watachukua fomu Ofisi ya Msimamizi wa Uchaguzi Jimbo la Nanyumbu.