Mifugo 36 yauwawa kikatili kijiji cha Lukula

Posted on: August 14th, 2018

Katibu Tawala wa Wilaya ya Nanyumbu Ndugu Salum A. Palango akizungumza na wananchi wa kijiji cha Lukula katika kikao cha kutatua mgogoro wa wakulima na wafugaji 

Jumla ya mifugo thelathini na sita (36) wakiwemo ng'ombe, mbuzi, kondoo na mbwa wameuwawa kikatili katika kile kilichodaiwa kuwa ni mgogoro kati ya wakulima na wafugaji katika kijiji cha Lukula kata ya Masuguru wilayani Nanyumbu. Siku ya Jumapili ya tarehe 12/Agosti/2018 mfugaji aitwaye Jacksoni Momoita alimjeruhi kwa fimbo mkulima Oscar Tumaini Manduta aliyekuwa akiizuia mifugo kupita karibu na shamba lake hali iliyopelekea wananchi waliokuwa karibu kumvamia mfugaji huyo na kumshushia kipigo. Wananchi hao hawakuishia hapo tuu bali walivamia kambi mbalimbali zenye wafugaji na kuiuwa pamoja na kuijeruhi vibaya mifugo yao.

Katibu Tawala wa Wilaya ya Nanyumbu Ndugu Salum A. Palango ambaye amemwakilisha Mkuu wa Wilaya ya Nanyumbu Mh. Moses Joseph Machali akiwa ameongozana na Kamati ya Ulinzi na Usalama ya Wilaya amefika kijijini hapo na kufanya mazungumzo na wanakijiji huku akiwaagiza wananchi kuilinda amani. Uongozi wa Wilaya umelaani vikali tabia ya wananchi kujichukulia sheria mkononi na kuwaagiza kutii sheria na kanuni za nchi ili kuilinda na kuidumisha amani. Aidha, vyombo vya Ulinzi na Usalama vinaendelea na uchunguzi wa tukio hilo.

Baadhi ya Wananchi wa kijiji cha Lukula wamesema kuwa wamechoshwa na tabia ya wafugaji kuvamia mashamba ya wakulima na kulisha mifugo yao mara kwa mara. Aidha, wananchi hao wamesema wanashangazwa sana na kitendo cha wafugaji kuyaacha maeneo maalumu waliyotengewa na Serikali kwa ajili ya ufugaji na kwenda kuishi kwenye maeneo ya wakulima na kusababisha migogoro.