Mangaka Sekondari Yakonga Nyoyo za Kidato cha Tano 2024

Posted on: July 12th, 2024

Na, Lunanilo Ngela

Wanafunzi waliochaguliwa na serikali kujiunga na kidato cha tano katika shule ya sekondari Mangaka, iliyopo Wilaya ya Nanyumbu Mkoa wa Mtwara kwa mwaka 2024, wameripoti shuleni hapo na kuanza rasmi masomo yao.

Wanafunzi hao wa michepuo ya Historia, Kiswahili na Kiingereza (HKL), Kemia, Biolojia na Jiografia (CBG), pamoja na Historia, Jiografia na Fasihi (HKLi), kutoka mikoa mbalimbali ya Tanzania, wameelezea furaha yao ya kujiunga na shule hiyo huku wakiahidi kufanya vema katika masomo yao.

Ikumbukwe kuwa shule hiyo ilikuwa shule ya kwanza kabisa kupokea wanafunzi wa kidato cha tano mwaka 2020. Kuanzishwa kwa kidato cha tano katika shule hiyo ilikuwa hatua mhimu ya kutimiza ndoto ya wananchi wa Nanyumbu ya kuwa na shule yenye kidato cha tano na sita.

Shule hiyo imetoa awamu tatu za wanafunzi waliohitimu kidato cha sita na kufaulu vizuri katika masomo yao. Mafanikio hayo makubwa ya kitaaluma yanatokana na juhudi kubwa ya walimu na wanafunzi, pamoja na mazingira bora na rafiki ya shule hiyo.

Nayo Halmashauri ya Wilaya ya Nanyumbu, kupitia mapato yake ya ndani, fedha kutoka serikali kuu, pamoja na nguvu za wananchi, imefanikiwa kujenga na kuanzisha shule zingine tatu ambazo kwa mwaka 2024 zimepokea wanafunzi wa kidato cha tano, ikiwemo Shule ya Sekondari ya Wasichana Mkapa, Shule ya Sekondari Nangomba, na Shule ya Sekondari Nanyumbu.

Halmashauri hiyo inakaribisha wawekezaji kuwekeza katika sekta ya elimu, hususani katika ujenzi wa vyuo vya kati na vyuo vikuu. Wilaya hiyo ina ardhi ya kutosha, pamoja na miundombinu rafiki ya barabara na mawasiliano. Uwekezaji katika miundombinu ya elimu utakuwa na tija na manufaa makubwa, si kwa Nanyumbu tu, bali pia kwa Wilaya jirani ambazo bado hazina vyuo hivyo.