MAFUNZO YA MIKOPO YA ASILIMIA KUMI KWA VIKUNDI YAMEFUNGWA WILAYANI NANYUMBU.

Posted on: January 15th, 2025

Mafunzo ya vikundi vinavyotarajiwa kupewa mikopo ya asilimia 10 kwa wanawake, vijana, na watu wenye ulemavu yamehitimishwa  Januari 14, 2025, katika Kata ya Masuguru, Wilaya ya Nanyumbu. Mafunzo hayo yalifungwa rasmi na Mkuu wa Wilaya ya Nanyumbu, Mhe. Christopher Magala, aliyewakilishwa na Afisa Tarafa wa Nakopi, Ndugu Edwin Musa.

Mafunzo hayo, yaliyoendeshwa kwa siku sita, yaliratibiwa na Idara ya Maendeleo ya Jamii kwa lengo la kuwapa walengwa elimu kuhusu usimamizi na uendeshaji wa miradi yenye tija. Lengo kuu lilikuwa kuhakikisha walengwa wanarejesha mikopo kwa wakati na kuendeleza miradi yao kiuchumi.

Kwa mujibu wa Afisa Maendeleo ya Jamii wa Wilaya, Ndugu Omary Koja Hassani, mada zilizofundishwa zilihusisha wajibu, haki na majukumu ya wanakikundi, utatuzi wa migogoro, usimamizi wa biashara, utunzaji wa kumbukumbu, usimamizi wa fedha, na utunzaji wa mali za vikundi. Alieleza kuwa mafunzo haya yanalenga kuhakikisha mikopo inatumika kwa tija, wanakikundi wanapata faida, na nafasi za ajira zinaongezeka kwa makundi lengwa.

Akifunga mafunzo hayo, Ndugu Edwin Musa aliwataka wanufaika kuhakikisha wanazingatia taratibu za mikopo kama zilivyoainishwa kwenye mikataba yao. “Mafunzo haya yamewapa maarifa muhimu ya kuendesha vikundi vyenu. Hakikisheni mnatekeleza mliyofundishwa, na mnapohitaji msaada, maafisa maendeleo jamii kata wapo kwa ajili yenu,” alisema.