Maafisa Uandikishaji Nanyumbu Wapatiwa Mafunzo na Kula Kiapo, Waaswa Kuzingatia Sheria za Uchaguzi

Posted on: October 8th, 2024

Hakimu Mfawidhi Mwandamizi wa Mahakama ya Wilaya ya Nanyumbu, Mhe. Asifiwe Jembe akizungumza na maafisa waandikishaji

Na, Lunanilo Ngela

Maafisa uandikishaji 526 wa orodha ya wapiga kura wa Wilaya ya Nanyumbu wameapishwa na Hakimu Mfawidhi Mwandamizi wa Mahakama ya Wilaya, Mhe. Asifiwe C. Jembe, huku akiwataka kuzingatia sheria, kanuni, na taratibu za uchaguzi ili kuhakikisha zoezi hilo linafanikiwa.

Akizungumza katika hafla ya kuwaapisha maafisa hao iliyofanyika kwenye vituo vya Mangaka, Michiga, Mikangaula, na Nanyumbu Oktoba 08, 2024, Mhe. Jembe aliwaeleza kuwa zoezi hilo ni nyeti na muhimu kwa maendeleo ya taifa. Aidha, aliwataka maafisa hao kuwa waadilifu na kutekeleza majukumu yao kwa uaminifu katika kipindi chote cha uandikishaji wapiga kura.

Maafisa hao wamepatiwa mafunzo maalum ya kuwajengea uwezo katika kutekeleza majukumu yao kabla na wakati wa uandikishaji wa wapiga kura unaotarajiwa kufanyika kuanzia Oktoba 11 hadi 20, 2024.

Wilaya ya Nanyumbu itakuwa na jumla ya vituo 526 vya kuandikishia wapiga kura, ambao watashiriki katika Uchaguzi wa Serikali za Mitaa unaotarajiwa kufanyika Novemba 27, 2024. Katika uchaguzi huo, wananchi watapiga kura kuchagua Wenyeviti wa Vijiji, Wajumbe wa Halmashauri za Vijiji, na Wenyeviti wa Vitongoji.

Serikali za Mitaa, Sauti ya Wananchi, jitokeze kushiriki Uchaguzi