Baraza la Madiwani Nanyumbu Laridhia Biashara ya Hewa ya Ukaa

Posted on: August 22nd, 2024

Mwenyekiti wa Mkutano wa Baraza la Madiwani akifungua mkutano

Na; Lunanilo Ngela

Baraza la Madiwani wa Halmashauri ya Wilaya ya Nanyumbu limefanya mkutano wake Agosti 22, 2024 chini ya uongozi wa Makamu Mwenyekiti wa Halmashauri, Mheshimiwa Yustus Mmuni, ambapo wajumbe wamejadili na kuridhia masuala mbalimbali ya Halmashauri, ikiwa ni pamoja na mpango mpya wa biashara ya uvunaji wa hewa ya ukaa.

Katika mkutano huo, wajumbe wa Baraza walijadili na kupitisha Mpango wa Usimamizi wa Msitu wa Hifadhi uliopo katika kijiji cha Mkumbaru, kwa lengo la kuwezesha kijiji hicho kufanya biashara ya hewa ya ukaa (kaboni).

Pia, wajumbe waliridhia mkataba wa kuanzisha, kutekeleza, na kugawana gharama na faida ya mradi wa hewa ya ukaa kati ya kijiji cha Mkumbaru, Halmashauri ya Wilaya ya Nanyumbu, na kampuni ya Village Climate Solution Limited. Aidha, walipitia na kuridhia rasimu za sheria ndogo za usimamizi wa msitu wa hifadhi wa kijiji cha Mkumbaru za mwaka 2024.

Biashara ya hewa ya ukaa ni mpango wa kimataifa ulioanzishwa kwa lengo la kupunguza uzalishaji wa gesi chafuzi kupitia mfumo wa kuuza na kununua haki za kutoa hewa ya ukaa. Mpango huu ulianza rasmi mwaka 2005 chini ya Mkataba wa Kyoto, ambapo nchi zilizoendelea hununua haki hizi kutoka nchi zinazoendelea ili kufidia uzalishaji wao wa gesi chafuzi. Faida za mpango huu ni pamoja na kuhamasisha uwekezaji katika teknolojia safi, kuhifadhi misitu, na kuchangia kupunguza ongezeko la joto duniani.