Wazee Nanyumbu kukabidhiwa Vitambulisho vya Matibabu bure

Posted on: August 27th, 2019

Mkuu wa Wilaya ya Nanyumbu Mhe. Moses J. Machali akigawa vitambulisho vya Matibabu kwa wazee wa Wilaya ya Nanyumbu.

Wazee wilayani Nanyumbu wameendelea kupatiwa vitambulisho vya Matibabu Bure ikiwa ni utekelezaji wa Ilani ya Chama Cha Mapinduzi ya Mwaka 2015-2020 katika Ukurasa wa 88 Kifungu cha 50 (P).

Akigawa vitambulisho hivyo katika Ukumbi wa Mikutano wa Halmashauri, Mkuu wa Wilaya ya Nanyumbu Mhe. Moses J. Machali amesema kuwa Serikali inatambua na kuthamini mchango mkubwa uliofanywa na wazee hao kwa Taifa hili. Serikali katika kuwarahisisha matibabu wazee hao, imeondoa gharama zote na hivyo wazee wote kuanzia miaka 60 watatibiwa bure.

Mkuu wa Wilaya amewakumbusha wazee kuendelea kusimamia maadili katika jamii, kuendeleza amani, umoja na mshikamano ikiwa ni pamoja na kuwafichua wahalifu. Aidha, amesema kuwa Serikali inaendelea kuimarisha huduma za Jamii katika Wilaya ya Nanyumbu ikiwemo Ujenzi wa Kituo Cha Afya Mtambaswala, Upanuzi wa Hospitali ya Wilaya Nanyumbu, Ujenzi wa Miundombinu ya Shule, Barabara na stendi.

Wazee wa Wilaya ya Nanyumbu wametoa shukrani zao za pekee kwa Rais wa Jamhuri ya Muungano wa Tanzania Mheshimiwa Dr, John Pombe Magufuli na Chama Cha Mapinduzi kwa kuwapatia vitambulisho vya matibabu bure. Aidha wameiomba Serikali iendelee kutetea na kusimamia haki za wazee hao katika Jamii.